VOV4.Êđê- Lŏ dơ̆ng hdră klei bi kƀĭn tal 11, hruê anei 12/5, Dhar bruă kƀĭn ala brei klei blŭ mguôp kơ  bruă hưn mdah hŏng bruă kƀĭn ala ksiêm dlăng, hdră mtrŭn duh bi liê Hdră bruă êlan dar mrô 4 krĭng ƀuôn prŏng phŭn Hà Nội, Hdră bruă êlan dar krĭng 3 ƀuôn prŏng Hồ Chí Minh.  Hdră bruă êlan dar mrô 4 krĭng ƀuôn prŏng Hà Nội dlông 112,8 km hŏng ênoh bi liê 85 êbâo 813 êklai prăk. Klei čiăng yua lăn hlăm brô 1 êbâo 341 ha. Ktuê êlan mrô 4 anei dưi ruh mgaih hlue si gru hmô hŏng boh prŏng mơ̆ng 90 truh 135m. Knŭk kna jao kơ Knơ̆ng bruă sang čư̆ êa ƀuôn prŏng Hà Nội klam bruă jing anôk bruă phŭn mkŏ mjing hlue ngă hdră bruă, rơ̆ng hnơ̆ng bi leh hdră bruă.  Hdră bruă êlan dar 3 ƀuôn prŏng Hồ Chí Minh mâo ênoh bi liê ebeh 75 êbâo 300 êklai prăk găn ƀuôn prŏng Hồ Chí Minh, Đồng Nai, Bình Dương, Long An hŏng boh dlông giăm 92 km. Anei jing hdră bruă yuôm bhăn ala čar, hlue ngă mơ̆ng 2022-2027

                                               Pô mblang: H’Zawut Ƀuôn Yă