VOV4.Êđê- Knŏng hlăm sa hruê kăm mơ̆ng hruê 14-2 truh kơ hruê 21/2, kluôm ƀuôn prŏng mâo êbeh 40 mâo klei ruă tưp Covid-19 jing phung nai leh anăn 430 čô jing hđeh sang hră. Ti anăp klei dleh dưi ksiêm dlăng mơ̆ng klei ruă tưp, Adŭ bruă mtô mjuăt bi hriăm ƀuôn prŏng Ƀuôn Ama Thuôt mâo leh klei kčĕ kơ bruă sang čư êa ƀuôn prŏng brei mdei êjai klei nao sang hră kơ jih jang phung hđeh sang hră, knŏng brei mă hđeh sang hră adŭ 9 leh anăn adŭ 12 dưi nao sang hră.

 Hlue si adŭ bruă mtô mjuăt bi hriăm ƀuôn prŏng Ƀuôn Ama Thuôt, čar Dak Lak, klei ruă tưp Covid-19 dôk dleh dưi ksiêm dlăng hŏng êbâo čô mnuih ruă hlăm sa hruê. Hlăm dŭm sang hră, khădah bruă mâo mnuih ruă hlăm sang hră mơar mâo leh klei mprăp êlâo, ƀiădah ênoh F0 đĭ lu ngă klei hmăi truh kơ ai tiê, klei mĭn phung nai, hđeh sang hră leh anăn amĭ ama. Gang mkhư̆ klei ruă tưp Covid-19 leh anăn mtô mjuăt bi hriăm mâo boh tŭ dưn, bi hơĭt ai tiê, klei mĭn phung nai, hđeh sang hră leh anăn phung amĭ ama jing mta kñăm tal êlâo hĭn hlăm dŭm sang hră mơar ară anei.

Pô mblang: Y-Ƀel Êban