VOV4.Êđê - Tlam hruê 9/2, Khuất Việt Hùng, K’iăng khua thơ̆ng kơ bruă hlăm Dhar bruă răng mgang klei êđăp ênang ala čar mbĭt hŏng êpul mă bruă nao leh ti Gia Lai čiăng ksiêm dlăng klei mâo, bi hgŭm hŏng phung khua kiă kriê alŭ wăl, gĭt gai, msir mghaih klei truh kjham hlăm êlan klông ngă 6 čô djiê, 3 čô êka hlăm čang rang aguah hruê anei mơh.

Leh mâo klei truh, bi ala Anôk bruă răng mgang klei êđăp ênang êlan klông čar Gia Lai nao čuă, bi juh klei ênguôt hnĭng lehanăn đru 3 êklăk prăk/čô êka, gŏ sang mnuih djiê 5 êklăk prăk/čô. Kdriêk Đăk Đoa ăt đru 3 êklăk prăk/čô êka lehanăn 5 êklăk prăk/čô djiê. Leh mmông mă bruă, Êpul mă bruă mơ̆ng Dhar bruă răng mgang klei êđăp ênang ala čar nao čuă êmuh, mđĭ ai gŏ sang mnuih mâo klei truh anei./.

H’Nêč pô mblang