Bi mni kơ ai tiê thâo gĭr mơ̆ng mnuih ƀuôn sang lehanăn dŭm êpul êya dôk đru dŏng mnuih mâo klei truh, k’iăng khua knŭk kna čih yap čar Khánh Hòa tiŏ nao leh jih hnơ̆ng êpul lĭng kahan, hlăm anăn Knơ̆ng kiă kriê kahan êa krĭng 4 yua ca nô jih hrue mlam mđuĕ mnuih ƀuôn sang mơ̆ng anôk huĭ hyưt.,. Lĭng kahan kahan ksiêm lehanăn êpul kahan knhăk hlăm êa mâo tiŏ nao truh hlăm dŭm boh ƀuôn hgŭm dôk hlăm klei bi ktlah. Khădah êa ară anei dơ̆ng hrŏ leh, ƀiădah ăt dôk dleh dưi ksiêm dlăng, adiê ăt dôk hjan, lu kdrêč êlan ăt dôk êngăp hlăm êa. K’iăng khua knŭk kna mtă kơ mnuih ƀuôn sang ăt gĭr dôk kdê hlăm anôk êđăp ênang, đăm ruăt kơ sang hjăn ôh, êjai ka mâo klei mtă mơ̆ng bruă sang čư̆ êa./.

Truh kơ tlam mmăt mbruê 20/11, hjan ti nah Ngŏ - Dhŭng kwar krah leh anăn Lăn Dap Kngư hrŏ leh klei ktang. Anôk hjan lu hĭn ti hnơ̆ng êbeh 350 mm, hrŏ krah wah mkă hŏng hnơ̆ng hjan 19/11. Knơ̆ng bi êran pui kmlă krông Ba hạ ăt bi hrŏ hnơ̆ng phưi êa leh anăn êa lêč ti dŭm hnoh krông ti Gia Lai, Dak Lak hrŏ sơăi. Êlan dơ̆ng mrô 29 mkŏ Yŭ leh anăn Ngŏ Dak Lak dưi bi hluh leh anăn lu êpul đru dŏng ba mbĭt hŏng kdrăp yua, mnơ̆ng ƀơ̆ng, êa drao truh ti nah Ngŏ đru kơ mnuih ƀuôn sang krĭng êa lip. Hnơ̆ng klei hưn brei răng klei truh yan adiê mơ̆ng hnơ̆ng 3 hruê anei, dưi bi hrŏ jing hnơ̆ng 1 hlăm 2 hruê kơ anăp. Ti čar Lâm Đồng, anôk hjan hlĭm, êa lêč ktang phĭt ăt hrŏ leh mơh, lu hĭn ti dŭm să D’Dral, Đơn Dương… nah tluôn knơ̆ng êa phŭn pui kmlă Dă Nhim, ăt êgao leh boh klei mjêč. 1500 čô mnuih ƀuôn sang dưi mbĕ đuĕ kơ anôk êđăp ênang. Leh êa lêč hrŏ, mnuih ƀuôn sang leh anăn Bruă sang čư̆ êa alŭ wăl dôk mgaih msir boh jhat. Bruă đru dŏng ti krĭng êa lêč nah Ngŏ - Dhŭng kwar krah leh anăn Lăn Dap Kngư ăt dôk mjêč leh anăn mâo lu klei hŭi hyưt.

Ti Lâm Đồng, kyua klei pŏk êa mơ̆ng phŭn pui Đa Nhim – Hàm Thuận – Đa Mi găn êlan êa mlai Đơn Dương êa lŏ đĭ nanao ka mdei ôh jih mlam 19/11, mâo mmông êa đĭ truh 2.580 m³/s, dŭm boh ƀuôn hgŭm nah tluôn hnoh krông Đa Nhim – hlăm anăn mâo ƀuôn hgŭm D’ran – êngăp leh êlam hlăm êa. Čar tiŏ nao leh djăp êpyl êya, mnơ̆ng mnuă mbĕ mđuĕ êbeh 1.500 čô mnuih ti ƀuôn hgŭm D’ran truh kơ anôk êđăp ênang Tui si klei čih yap tal êlâo, mâo giăm 750 boh sang êngăp hlăm êa, jhat rai kjham; 5 boh sang klưh, hlăm brô 1.320ha djam mtam luič liê. Hjan prŏng ngă lu anôk klưh hroh, jhat rai hlăm êlan klông mơ̆ng čar. Êngao kơ kčŭn čư̆ Mimosa – hlăm êlan dơ̆ng mrô 20 – lu kdrêč êlan mčah, êlan hlăm ƀuôn sang jhat rai lu anôk. Êlan mơ̆ng  ƀuôn hgŭm  Đan Phượng nao kơ ƀuôn hgŭm Tân Thanh (ară anei dôk hlăm ƀuôn hgŭm Tân Hà – Lâm Hà) klưh prŏng amâo lŏ thâo găn êrô ôh. Phung khua kiă kriê knơ̆ng bruă sang čư̆ êa čar Lâm Đồng mtă kơ bruă sang čư̆ êa dŭm boh ƀuôn hgŭm, lehanăn êpul êya djŏ tuôm lŏ dơ̆ng mbĕ mnuih ƀuôn sang truh kơ anôk êđăp ênang, mkăp djăp mnơ̆ng ƀơ̆ng huă, êa mnăm, abăn mŭng, lehanăn mnơ̆ng yua mkăn./.

-Klei ƀuôn hgŭm D’ran êngăp hlăm êa leh phŭn pui pŏk êa, ngă lip jih alŭ wăl mnuih ƀuôn sang dôk, tơl bi ktlah hlăm lu anôk