Čar Gia Lai dôk pŏk ngă kjăp hdră mdrơ̆ng hŏng angĭn êbŭ mrô 13 (Kalmaegi) ti gưl 5, gưl ktang hĭn hlăm hdră mdrơ̆ng hŏng klei yan adiê ngă ti 16 să ktuê hang ksĭ lehanăn gưl 4 ti 42 să adôk ti nah Ngŏ car. Tĭng, êlâo kơ 12h yang hruê dơ̆ng hruê anei, čar srăng ngă leh bruă mbĕ giăm 100.000 gŏ sang, bi knar 350 êbâo čô, ti dŭm krĭng ktuê hang ksĭ, kñăm rơ̆ng klei êđăp ênang êlâo kơ angĭn êbŭ tlă.

Knơ̆ng bruă gĭt gai hdră mdrơ̆ng hŏng angĭn êbŭ čar Gia Lai ti ƀuôn hgŭm An Nhơn, mâo Phạm Anh Tuấn – Khua knơ̆ng bruă sang čư̆ êa čar, Khua knơ̆ng gĭt gai hdră gang mkhư̆ sowil mơ̆ng car ngă khua êpul. Phung khua hlăm Anôk bruă Đảng čar mâo kah mbha bruă ksiêm dlăng, gĭt gai hdră gang mkhư̆ klei angĭn êbŭ ngă ti krĭng Quy Nhơn, Hoài Ân, Tây Sơn, Hoài Nhơn, Vĩnh Thạnh, Phù Mỹ lehanăn dŭm să nah Yŭ čar Gia Lai, rơ̆ng kjăp hdră ngă bruă hluê “4 tinăn mtam”, mprăp mdrơ̆ng hŏng djăp boh klei mjêč tơdah angĭn êbŭ mrô 13 tlă hriê.

Kluôm čar Daklak mâo jih jang truh 2.555 hô̆ pui trah mă kan/10.994 čô mnuih mă bruă, ară anei wĭt kdê leh hlăm anôk êđăp ênang sơăi, hjăn ti ƀuôn hgŭm  Xuân Đài kiă kriê 363 boh hô̆ pui trah mă kan, truh 4h tlam mbrue jih jang dưi wĭt kơ hang leh sơăi. Klei răng kriê jih jang bruă rông kan hdang hlăm êa ksĭ mâo ngă kjăp hŏng 536 war rông kan; 23.329 war rông hdang, lehanăn  war rông hdang prŏng, lehanăn war rông briăng ksĭ; êpul bruă djŏ tuôm kiă kriê bruă lŏ bi kjăp jih jang anôk rông anei êlâo kơ 10h aguah mbrue 6/11. Mbĭt hŏng anăn rơ̆ng bi mâo mnơ̆ng ƀơ̆ng huă, kdrăp đru dŏng bi tiŏ ba. Knơ̆gn bruă duh mkra mnia mblei bi leh bruă mkăp mnơ̆ng mnuă hŏng êbeh 400 tôn braih, êbeh 10.350 khơ̆ng mgơ̆ng êa, 72.000 huôm ƀung hdang krô, lehanăn êbeh 1.000 pŏk pioh tăm sang dôk, lehanăn tiŏ nao phung hdriam gưl prŏng, mnơ̆ng mnuă yua pioh kơ klei kăp đru dŏng. Kiă kriê ti anôk bruă kiă kriê ƀuôn sang, khua knơ̆ng bruă sang čư̆ êa čar Tạ Anh Tuấn mâo klei mtă kơ dŭm alŭ wăl kăp mdrơ̆ng hŏng ya mta klei amâo mâo jăk truh, rơ̆ng mgang kjăp klei hdĭp mnuih ƀuôn sang.

Ară anei, kluôm čar Khánh Hòa mâo giăm 7.000 hô̆ mran, hlăm brô 900 boh hŏng êbeh 5.700 čô mnuih mă bruă, dưi hưn mthâo lehanăn iêu mthưr brei nao kđap ti anôk êđăp ênang. Jih 3.400 ênao rông kan hŏng êbeh 100.000 ñuăl rông amâo lŏ ngă bruă êjai. Dŭm knơ̆ng kdơ̆ng êa dưi ksiêm dlăng kjăp, pŏk phai djŏ guôp, rơ̆ng klei êđăp ênang krĭng nah tluôn. Hluê anôk bruă đăo knăl yan adiê, mơ̆ng 6 – 8/11, Khánh Hòa srăng mâo adiê hjan prŏng, angĭn ktang gưl 10 -12, êa puh yă 3 – 5m.

Hŏng ai tiê gĭr lehanăn bi hgŭm mguôp, čar dôk mkŏ mjing leh hdră gang mkhư̆, mdrơ̆ng hŏng klei khăp, rơ̆ng bi hrŏ tuič hnơ̆ng klei luič liê, rơ̆ng klei êđăp ênang kơ mnuih ƀuôn sang jing mrô sa./