Bruă ba hdră bruă knơ̆ng prăk truh giăm hŏng mnuih ƀuôn sang amâo lŏ djŏ jing klei blŭ ôh, ƀiădah lŏ dôk mâo klă klơ̆ng hlăm djăp ktuê êlan lăn hrah Lăn Dap Kngư. Boh boh êdeh knơ̆ng prăk êrô hiu, dưi mprăp djăp ênŭm măi tính, masin kđăm mkra, masin yap prăk leh anăn mkŏ êlan internet mrâo mrang hlăm dŭm ƀuôn êlan krĭng taih kbưi mơ̆ng Lăn Dap Kngư, pŏk klei găl ba yua hdră bruă knơ̆ng prăk găl ênưih leh anăn klă mngač kơ mnuih ƀuôn sang tinei.

 Hrô kơ nao dŭm pluh km msĕ si êlâo dih, mnuih ƀuôn sang ară anei ênưih ngă hră mơar čan prăk, mă prăk, jao prăk mnga, mkiêt mkriêm ti să pô mtam. Grăp anôk ngă bruă dưi mkŏ mjing klă klơ̆ng, yua kdrăp mrâo mrang, rơ̆ng êđăp ênang, bi hrŏ wưng msir mgaih hră mơar. Bruă ngă mơ̆ng dŭm êpul čan prăk leh anăn êdeh mdiăng êrô hiu ba leh dŭm êbâo êklai prăk brei čan đru ba ala ƀuôn hŏng mnuih ƀuôn sang krĭng djuê ƀiă, đru mkra mjing lŏ hma leh anăn mđĭ kyar bruă duh mkra gŏ sang.

 Ti čar Dak Lak, truh 30/6, Agribank mâo ênoh prăk brei čan 21.700 êklai prăk, hlăm anăn 2/3 kơ anôk bruă lŏ hma krĭng ƀuôn sang hŏng êbeh 34 êbâo čô čan. Võ Tiến Nam,  K’iăng Khua Agribank ti čar Dak Lak brei thâo:

 “ Tơdah hmei ba êdeh êdâo msir mgaih klei brei čan prăk ti dŭm anôk êrô hiu, mnuih ƀuôn sang dăp hruê mmông, brei čan prăk găl ênưih hĭn. Khădah snăn, ăt adôk lu klei dleh dlan tơdah nao hlăm krĭng taih kbưi snăn anôk bruă kdrăp mnơ̆ng ka mâo.”

 Amâo djŏ knŏng ti gưl nah gŭ ôh, amâodah bruă brei čan prăk, yua kdrăp mrâo dôk dưi pŏk mlar, mkŏ hrăm mbĭt hŏng dŭm bruă mdê mdê mơ̆ng bruă duh mkra.  Knơ̆ng bruă sang čư̆ êa čar Khánh Hòa mkŏ mjing Anôk bruă ktuê dlăng, gĭt gai thâo mĭn, anei jing sa knhuang yuôm bhăn hlăm hdră hlue nga Hdră mtrŭn mrô 57 mơ̆ng  Phŭn bruă kđi čar kơ klei mđĭ kyar kreh knhâo, kdrăp mrâo leh anăn mlih mrô ala čar, ăt msĕ mơh Hdră mtrŭn mrô 68 kơ klei mđĭ kyar bruă duh mkra êngao knŭk kna.

 Anôk bruă anei bi mguôp 7 kdrăp mă bruă, 15 hdră bruă leh anăn 22 hnơ̆ng kčah, brei mkŏ hrăm mbĭt plah wah mnuih ƀuôn sang, anôk bruă duh mkra leh anăn bruă sang čư̆ êa dŭm gưl. Dŭm ênoh mrô kơ hdră kčah, lăn ala, hdră bruă iêô mthưr bi liê dưi hưn mdah klă mngač, đru kơ anôk bruă ksiêm dlăng klei hâo hưn găl ênưih, pral. Nguyễn Tấn Tuân, Khua hđăp Knơ̆ng bruă sang čư̆ êa čar Khánh Hòa brei thâo, bruă yua ênoh mrô kriê dlăng amâo djŏ knŏng đru mkra mlih hră mơar  knŭk kna ôh ƀiădah lŏ jing tur knơ̆ng mđĭ klei klă mngač hlăm bruă bi liê, mjing anôk mnia blei mtăp mđơr.

 “Klă sĭt hmei amâo srăng bi tuôm hŏng grăp anôk bruă duh mkra ôh ƀiădah bi tuôm hlăm internet, kyua anăn ñĕ kơ klei bi kral amâodah mâo bruă anei bruă mkăn. Hmei ƀuh mâo leh kdrăp klă mngač kơ dŭm anôk bruă duh mkra, grăp anôk bruă duh mkra tăp mđơr tơdah hgŭm bi liê ti čar Khánh Hòa.”

 Thŭn 2025 jing thŭn “đĭ kyar, êdah kdlưn truh hdră kñăm” mơ̆ng hdră kčah mđĭ kyar bruă duh mkra ala ƀuôn 5 thŭn 2021–2025, bruă knơ̆ng prăk mâo jao bruă klam mdua: krơ̆ng hơĭt kjăp bruă duh mkra mrô, mjing boh kdrŭt brei čan kơ klei đĭ kyar.

 Ară anei, dŭm čar Dhŭng kwar krah leh anăn Lăn Dap Kngư dôk mâo jao bruă klam đĭ kyar GRDP mơ̆ng 8-13%.  Knơ̆ng bruă knŭk kna hnưm pŏk ngă hrăm mbĭt lu hdră msir hdră bruă. Knơ̆ng prăk knŭk kna tă hdră bi hrŏ prăk mnga gĭt gai, mbĭt anăn mtă kơ dŭm knơ̆ng prăk mnia blei bi hrŏ ênoh bi liê čiăng mtrŭn prăk mnga brei čan hŏng klei sĭt. Ênoh prăk brei čan ăt dưi mđĭ, mđing kơ dŭm bruă čiăng êdi msĕ si mkra mjing, ba čhĭ kơ ala tač êngao, bruă kăp đru leh anăn anôk bruă duh mkra điêt leh anăn man dưn. Mbĭt anăn jing pŏk ngă dŭm hdră brei čan mă mnga hdjul hlue si hdră êlan mơ̆ng Knŭk kna, mđing kơ dŭm bruă mđing tal êlâo msĕ si mđĭ kyar bruă lŏ hma leh anăn krĭng ƀuôn sang.

Đào Minh Tú,  K’iăng Khua Knơ̆ng prăk knŭk kna brei thâo, bruă knơ̆ng prăk bi mklă bruă klam phŭn hlăm klei hơĭt kjăp bruă duh mkra kluôm, ksiêm dlăng klei prăk luč ênoh leh anăn mjing boh kdrŭt đĭ kyar. Hŏng klei bi mguôp bruă kdrăp mrâo, hdră êlan djŏ guôp leh anăn ai tiê pral, knơ̆ng prăk srăng lŏ dơ̆ng hrăm mbĭt hŏng mnuih ƀuôn sang leh anăn anôk bruă duh mkra, đru ba lăn čar kjăp ktang mŭt hlăm ênuk đĭ kyar mrô, mrâo mrang leh anăn hơĭt kjăp. Đào Minh Tú lŏ brei thâo:

 “Mđĭ ktang ba yua kdrăp mrô hlăm klei mkăp hdră bruă knơ̆ng prăk - sa hdră tă sa anăn mơ̆ng ênuk mrâo, anei jing klei mrâo mrang brei ngă bi jăk. Bruă knơ̆ng prăk ngă leh, leh anăn dôk ba yua kdrăp mrâo si ngă čiăng kơ jăk, găl ênưih srăng dưi bi hrŏ ênoh bi liê amâo čiăng êdi kơ anôk bruă duh mkra. Anăn jing ênoh bi liê găn êrô, hră mơar… djŏ tuôm kơ ênoh brei čan, srăng đru mkăp hdră bruă tŭ dưn, ênoh bi liê ƀiă.”