Sang hră gưl sa – gưl dua Sa Loong, să Sa Loong, čar Quảng Ngãi ară anei mâo 36 adŭ hŏng êbeh 1.100 čô hđeh hriăm hră, hlăm anăn 90% jing anak aneh mnuih djuê ana ƀiă msĕ si Sedang, Ca Dong, Jeh Triêng, Bahnả, Brâu, Êđê, Mường, Tày… Thŭn hriăm ti anăp, sang hră tĭng srăng đĭ truh 40 adŭ hŏng hlăm brô 1.250 čô hđeh hriăm hră. Sang hră gưl sa – gưl dua Sa Loong dưi ruah mkŏ mjing jing sang hră mlir gưl čiêm rông phung hđeh hlăm kluôm să. Anei jing hdră êan yuôm bhăn, đru kơ phung hđeh krĭng knông lăn mâo klei găl hriăm hră jăk hĭn.

Nguyễn Hữu Phượng, Khua Sang hră gưl sa – gưl dua Sa Loong brei thâo, ară anei sang hră maoa 70 čô knuă druh, nai mtô, mnuih mă bruă. Sang hră mkŏ mjing hdră mtô bi hriăm 2 blư̆/hruê hlăm lu thŭn êgao ƀiădah ka mâo klei găl mkŏ mjing hdră dôk huă yang hruê kơ phung hđeh. Sang hră dôk bi hgŭm hŏng Anôk bruă sang čư̆ êa să Sa Loong lehanăn dŭm anôk bruă djŏ tuôm pŏk mlar ênhă lăn kơ bruă mkŏ mjing sang hră mlir gưl čiêm rong phung hđeh hluê si klei kčah mtrŭn mơ̆ng Phŭn bruă Sang hră mơar hŏng ênhă 5 ha.

“Leh mâo klei hưn mthâo, mơ̆ng hruê 3/11/2025 srăng rŭ mdơ̆ng, kyua anăn dŭm knơ̆ng, dhar bruă dŭm gưl dôk mjêč mkra mlih lehanăn ba mdah hdră mtrŭn hluê ngă. Araư anei, adŭ hriăm kơ phung hđeh ăt ênŭm, bruă mdơ̆ng anei amâo hmăi truh kơ hdră mtô bi hriăm. Jih jang čang hmăng hdră mtrŭn anei hnưm dưi pŏk ngă čiăng kơ mnuih ƀuôn sang dưi dưn hdră mtrŭn mơ̆ng Knŭk kna kơ krĭng knông lăn”.

Hluê si Nguyễn Ngọc Thái, Khua knơ̆ng bruă sang hră mơar mtô bi hriăm čar Quảng Ngãi, hluê ngă hdră mtrŭn mơ̆ng Knŭk kna, čar Quảng Ngãi rŭ mdơ̆ng 9 boh sang hră gưl sa lehanăn gưl dua knŭk kna čiêm rông ti 9 să knông lăn mơ̆ng čar. Hlăm wưng tal 1, thŭn 2025, čar srăng mdơ̆ng ti 4 să mâo Dục Nông, Sa Loong, Rờ Kơi lehanăn Mô Rai; ênoh duh êbeh 1.000 êklai prăk. Nguyễn Ngọc Thái brei thâo, hlăm thŭn 2025, Knŭk kna mkăp leh kơ čar 117 êklai prăk, ênoh adôk srăng mkăp hlăm thŭn 2026.

“Boh klei ară anei dôk kpăk đuôm ƀiădah dŭm knơ̆ng, dhar bruă sa ai hŏng hdră mdơ̆ng anei. Dlăng kluôm, lăn mơ̆ng să sơaĭ ƀiădah kdrêč lăn mkăp kơ bruă mtô bi hriăm ka mkăp ôh. Kyua anăn, ară anei brei mâo hdră mkra mlih, thiăm mbŏ hdră čuăl mkă čiăng dưi mkăp lăn, pral rŭ mdơ̆ng sang hră hlăm wưng hnưm hĭn.

Čar Lâm Đồng mâo 5 să knông lăn, mâo Tuy Đức, Quảng Trực, Thuận Hạnh, Thuận An lehanăn Dak Wil. 5 să anei mâo 47 anôk bruă mtô bi hriăm hŏng 39 sang hră knŭk kna, 5 êngao knŭk kna. Hlăm anăn knŏng mâo 1 sang hră čiêm rông phung hđeh mnuih djuê ƀia. Hluê ngă klei gĭt gai mơ̆ng Knơ̆ng bruă sang čư̆ êa čar, knơ̆ng bruă sang hră mơar mtô bi hriăm čar Lâm Đồng dôk bi hgŭm hŏng dŭm anôk bruă djŏ tuôm lehanăn bruă knŭk kna pŏk hdră mdơ̆ng grăp să sa boh sang hră čiêm rông phung hđeh mnuih djuê ƀiă.

Hluê si Lê Thị Bích Liên – Khua knơ̆ng bruă sang hră mơar mtô bi hriăm čar Lâm Đồng, mâo leh 2 knông lăn, să Thuận An lehanăn Quảng Trực dôk mprăp mdơ̆ng hlăm thŭn 2025 anei. Grăp boh sang hră mâo 30 adŭ hriăm, mkăp kơ 1000 čô hđeh hriăm hră. Lê Thị Bích Liên hơ̆k mơak lehanăn čang hmăng dŭm hdră anei srăng đru kơ phung hđeh krĭng knông lăn mâo anôk huă ƀơ̆ng, anôk dôk hơĭt kjăp, đru mđĭ kyar klei thâo lehanăn bi kjăp hdră răng mgang klei êđăp ênang ti krĭng knông lăn.

“Ti să Quảng Trực lehanăn să Thuận An mâo Phŭn bruă Sang hră mơả mtô bi hriăm dưm hlăm ênoh să srăng duh bi liê, truh 114 êklai prăk lehanăn mtă brei rŭ mdơ̆ng êlâo kơ hruê 19/12/2025. Truh ară anei, să Thuận An mâo ênŭm klei găl lehanăn Anôk kriê dlăng hdră bruă 3 dôk ngă hră mơar čiăng kơ knhal jih mlan 10 lehanăn akŏ mlan 11 ti anăp srăng rŭ mdơ̆ng. Bi să Quảng Trực dôk hluê ngă hdră msir mghaih anôk ala, gĭr truh kơ jih mlan 12 srăng rŭ mdơ̆ng’.

Hluê ngă hdră êlan mơ̆ng Phŭn bruă kđi čar kơ bruă rŭ mdơ̆ng jih jang sang hră hlăm dŭm boh ƀuôn hgŭm ti knông lăn, hlăm thŭn anei, čar Daklak srăng rŭ mdơ̆ng 3 boh sang hră knŭk kna čiêm rông mlir gưl hŏng ênoh duh bi liê êbeh 390 êklai prăk. Dŭm boh sang hră anei mâo mdơ̆ng ti 3 boh ƀuôn hgŭm knông lăn jing Ia Lốp, Ia Rvê lehanăn Buôn Đon lehanăn srăng dưi rŭ mkra mđrăm hlăm sa blư̆ mơ̆ng akŏ mlan 11 anăp anei.

Khua bruă Đảng čar Dak Lak Lương Nguyễn Minh Triết brei thâo, Ia Lốp jing sa hlăm 7 ƀuôn hgŭm amâo mâo klei bi mŭt mbĭt ôh hlăm čar, mâo krĭng knông lăn jing mâo klei găl mâo mơh, lehanăn dôk găn klei dleh dlan prŏng mơh kyuadah anôk ala prŏng, mnuih hdĭp raih rưng, hnơ̆ng ênoh gŏ sang ƀun adôk lu. Khua bruă Đảng čar mtă, kơ alŭ wăl ksiêm bi klă klei dleh awăt krĭng wăl, brei mâo hdră êlan bi mlih klei mĭn  lehanăn mđĭ kyar hŏng klei kjăp hlăm wưng tinăp.

“Mnuih anăn, să anăn ƀiădah tui hluê hŏng klei găl mâo, hdră ngă bruă, klei čiăng kơ klei thâo kơ bruă ară anei đĭ lu, bruă klam êlâo adih mơ̆ng să knŏng 197 bruă đuič ară anei đĭ truh 1065 bruă. Kyua anăn, brei bi mklă kơhưm mơ̆ng pô mơ̆ng anăn yơh drei srăng bi mklă hdră mă bruă, hdră mkŏ mjing klei ngă bruă, bi mlih hnơ̆ng trah dlăng, klei mĭn mơ̆ng pô. Brei mâo klei bi mlih kluôm, mđing truh kơ hnơ̆ng trah dlăng mơ̆ng ala čar lehanăn klei mă bruă snăn kơh diih srăng dưi hluê ngă kjăp bruă djŏ guôp hŏng klei čiăng bi mlih ară anei”.