Mbĭt hŏng dŭm hdră msir gang mkhư̆ angĭn êbŭ kơ dŭm hdră bruă êlan klông, knơ̆ng kdơ̆ng êa ti dŭm alŭ wăl Dhŭng kwar Krah - Lăn Dap Kngư lŏ mprăp “4 bruă tinăn mtam”, srăng mbĕ đuĕ mnuih ƀuôn sang hnưm, amâo brei mâo klei amâo jăk. Hlue si hdră msir mdrơ̆ng hŏng angĭn êbŭ mrô 13, dŭm alŭ wăl krĭng Dhŭng kwar Krah - Lăn Dap Kngư pral iêô mthưr kŭm păn hlăm êa ksĭ nao kđap; mđoh êa hlăm knơ̆ng kdơ̆ng êa - phŭn pui kmlă.  Đa đa alŭ wăl pŏk ngă leh hdră msir mbĕ đuĕ mnuih ƀuôn sang hŏng klei mtă brei mbĕ đuĕ êlâo kơ 5 mmông tlam hruê 6/11. 

Ti anăp klei dleh dưi ksiêm dlăng mơ̆ng angĭn êbŭ Kalmaegi, Bruă sang čư̆ êa čar Lâm Đồng mâo leh hră gĭt gai mjêč, mñă kơ dŭm phŭn, dhar bruă, alŭ wăl leh anăn dŭm anôk bruă djŏ tuôm pral ngă dŭm hdră êlan bi mdrơ̆ng hŏng angĭn êbŭ, hjan hlĭm leh angĭn êbŭ.  Khua Bruă sang čư̆ êa čar Lâm Đồng mñă kơ dŭm alŭ wăl, anôk bruă knơ̆ng Phú Quý ktuê dlăng boh sĭt yan adiê, hmao hâo hưn kơ mnuih ƀuôn sang, amâo brei mâo klei ngă ngơi mang. Mbĭt anăn ksiêm dlăng dŭm alŭ wăl ktuê hnoh êa, hnoh krông, krĭng tlung, mâo klei arưp aram klưh hroh, čŏng mâo hdră êlan mbĕ đuĕ mnuih ƀuôn sang nao ti anôk êđăp ênang.

Čiăng mdrơ̆ng hŏng angĭn êbŭ mrô 13 (Kalmaegi) dôk truh giăm hŏng lăn hang hŏng klei dleh ktuê dlăng, knuă druh, lĭng kahan răng mgang knông lăn čar Gia Lai gĭr bi hgŭm hŏng  bruă sang čư̆ êa alŭ wăl đru mnuih ƀuôn sang bi kjăp pưk sang, mbĕ mnơ̆ng dhơ̆ng ti anôk êđăp ênang, mđĭ lar klei gak răng jih hruê mlam čiăng hmao mdrơ̆ng hŏng djăp klei truh tăm mâo.

Ară anei êpul răng mgang kdriêl êa ksĭ Gia Lai mâo 18 êpul hŏng 280 knuă druh, lĭng kahan hŏng 19 êdeh ô tô, 185 êdeh p’phŭt , 20 boh kŭm păn leh anăn mram hŏng kdrăp mnơ̆ng đru dŏng. Đại tá Trần Tiến Hải-  Kiăng Khua Anôk bruă gĭt gai lĭng kahan, hlŏng ngă Khua Anôk bruă kahan răng mgang knông lăn čar Gia Lai brei thâo: dŭm kđông, anôk răng mgang knông lăn mđĭ knuă druh nao ti dŭm krĭng awăt, hâo hưn, mtô mblang kơ mnuih ƀuôn sang mđĭ klei hưn brei răng, amâo ngă ngơi mang ti anăp angĭn êbŭ. Dŭm anôk bruă ăt pral mkra mđĭ anôk gak răng, sang hjiê jing anôk mnuih ƀuôn sang dôk tơdah čiăng. Mnơ̆ng ƀơ̆ng, êa drao dưi mprăp leh djăp ênŭm.