Ênoh bi liê kơ 7 boh sang hră jing 1.516 êklai prăk, mkŏ mjing mrâo hrăm mbĭt 212 adŭ hriăm leh anăn dŭm êpul bruă djŏ tuôm leh anăn anôk bruă nah gŭ. Dŭm hdră bruă srăng mjing tur knơ̆ng hriăm hơĭt kjăp kơ êbeh 7000 čô hđeh sang hră krĭng knông lăn Gia Lai, lu jing hđeh sang hră mnuih djiê ƀiă.

K’iăng Khua knŭk kna Hồ Quốc Dũng mñă klă: hdră bruă jing yuôm bhăn hŏng krĭng knông lăn, đru mđĭ kyar mnuih mă bruă, mkra mđĭ êpul bi hgŭm leh anăn răng mgang klei êđăp ênang lĭng kahan. K’iăng Khua knŭk kna Hồ Quốc Dũng mtă kơ čar Gia Lai mprăp bi jăk, kriê dlăng leh anăn mkŏ mjing klei bi lông rơ̆ng hnơ̆ng jăk, djŏ hnơ̆ng mă bruă. Mbĭt anăn, mtă kơ Phŭn bruă sang hră mtô bi hriăm hnưm bi leh klei bhiăn, hdră êlan đru kơ mnuih djuê ƀiă, boh nik dŭm hdră êlan djŏ tuôm kơ klei huă ƀơ̆ng, găn êrô, hriăm hră mơar.

Ăt hlăm hruê mbruê 16/11, Bruă sang čư̆ êa čar Quảng Ngãi mkŏ mjing knăm mphŭn rŭ mdơ̆ng 4 sang hră Knŭk kna rông ba mlir gưl hriăm gưl 1 - gưl 2 ti dŭm să knông lăn Dục Nông, Sa Loong, Rờ Kơi leh anăn Mô Rai. 

Blŭ hrăm hlăm knăm mphŭn pŏk, k’iăng Khua Knŭk kna Nguyễn Hòa Bình mnă ktang, dŭm anôk anei amâo djŏ knŏng jing anôk hriăm hră, mjuăt bi hriăm pô mơ̆ng hđeh sang hră ƀiădah lŏ jing klei bi hmô mơ̆ng klei đăo knang, klei mĭn kpưn đĭ leh anăn klei bi mguôp plah wah mnuih ƀuôn sang kluôm ala hŏng mnuih ƀuôn sang knông lăn. Bruă mphŭn rŭ mdơ̆ng dŭm sang hră anei ti krĭng knông lăn čar Quảng Ngãi jing hdră yuôm bhăn, bi êdah bruă klam mơ̆ng Đảng, Knŭk kna hŏng bruă sang hră mơar ti krĭng taih kbưi, krĭng knông lăn.