Mbĭt hŏng hdră mbĕ đuê̆ mnuih ƀuôn sang, ƀuôn hgŭm Sông Cầu ngă leh dŭm hdră bi kƀĭn, mprăp mnơ̆ng ƀơ̆ng, êa doh, êpul mdrao mgŭn, mbĭt anăn dăp êpul gak răng 24/24 ti anôk jưh mran leh anăn wăl anôk ƀuôn sang.

Dŭm sang đung ti êa ksĭ amâo brei mnuih ƀuôn sang adôk. mâo ƀô̆ mta ti alŭ Từ Nham, Đỗ Hữu Huy, k’iăng khua bruă Đảng čar Dak lak nao ksiêm dlăng dŭm anôk êa ksĭ đĭ, nao čhuă mnuih ƀuôn sang ti dŭm anôk dôk êjai leh anăn ktang phĭt brei mbĕ jih dŭm gŏ sang adôk. Čar Dak Lak iêo mthưr mnuih ƀuôn sang amâo mâo wĭt kơ pưk sang êjai angĭn êbŭ ka jih, amâo mâo brei nao ti êa ksĭ leh anăn mtô kơ mnuih ƀuôn sang, rơ̆ng kơ klei êđăp ênang anak mnuih hlăm 48 mmôntg angĭn êbŭ kdlưn hĭn.

Yap truh yang hruê 6/11, kluôm čar Gia Lai bi leh bruă mbĕ đuĕ êbeh 100 êbâo gŏ êsei mnuih ƀuôn sang, truh ti anôk êđăp ênang. Dŭm êtuh sang hră, sang dhar kreh leh anăn anôk bruă knŭk kna mjing anôk ñĕ kơ angĭn êbŭ. Dŭm hjiê mnơ̆ng dhơ̆ng, êa xăng, êa pui,  êa drao dưi mkăp, êpul mă bruă pui kmlă, dang kông, mdrao mgŭn gak răng jih hruê mlam čiăng rơ̆ng klei hâo hưn,bi blŭ hrăm, kriê dlăng klei suaih pral leh anăn klei čiăng mnơ̆ng dhơ̆ng kơ mnuih ƀuôn sang. 

Ti anăp klei dleh ktuê dlăng mơ̆ng angĭn êbŭ, Phạm Anh Tuấn- Khua Knơ̆ng bruă sang čư̆ êa čar Gia Lai, Khua Anôk bruă gĭt gai ba anăp, gĭt gai pŏk ngă hdră mdrơ̆ng gưl 5 ti 58 să, ƀuôn hgŭm krĭng wăl Gia Lai nah Ngŏ (čar Bình Định hđăp). Klei mĭn gĭt gai sa anăn mơ̆ng čar jing rơ̆ng êđăp ênang klei hdĭp kơ mnuih ƀuôn sang jing phŭn, êlâo hĭn; amâo brei ôh mnuih ƀuôn sang dôk ti krĭng huĭ hyưt. Djăp klei luč liê kyua kƀah klei răng, pô gĭt gai alŭ wăl srăng tŭ klei đua klam.

Thŭn anei, mnuih ƀuôn sang krĭng êa ksĭ Khánh Hoà mâo nanao klei răng. Êbeh 4.200 brŏng rông kan hdang hŏng dŭm êbâo čô mă bruă ti kplang Vân Phong legh anăn ksĭ Nha Trang mâo asăp mtrŭn brei nao ti hang. Lu gŏ sang kă brŏng rông kan hdanh hŏng klei kap prŏng, bi kjăp pưk dôk, đa đa bi kngam sa kdrêč brŏng rông kan čiăng bi hrŏ klei hmăi mơ̆ng angĭn poh yă. Ti 6 kdrŭn ksĭ leh anăn dôk jưh ktuê hang ksĭ, hlăm brô 5.000 kŭm păn mă kan truh ti hang êđăp ênang.

Ară anei hlăm kluôm čar, 9 êpul ngă bruă gưl čar mâo Bruă sang čư̆ êa čar Khánh Hoà mkŏ mjing, klă anăp nao ksiêm dlăng, gĭt gai leh anăn mtô kơ hdră bi mdrơ̆ng. Dŭm êpul ngă bruă dưi jao bruă klam ksiêm dlăng ênao êa, pui kmlă leh anăn klei blŭ hrăm, čŏng mprăp dŭm kdrăp yua, mnuih bi mdrơ̆ng hŏng hjan prŏng, êa lêč leh anăn klưh hroh lăn, rơ̆ng klei êđăp ênang kơ mnuih ƀuôn sang