Klei kƀĭn jing sa hdră êlan blŭ hrăm jêñ jêñ leh anăn hyuă kjăp plah wah Knŭk kna Việt Nam hŏng êpul êya anôk bruă duh mkra čiăng bi hơĭt dŭm klei găl mnia mblei čiăng êdi čiăng mtrŭt mđĭ klei đĭ kyar mơ̆ng êpul anôk bruă duh mkra êngao Knŭk kna, bi găl wăl duh bi liê mnia mblei, đru mguôp hlăm klei đĭ kyar bruă duh mkra hơĭt kjăp mơ̆ng Việt Nam. Hlăm klei kƀĭn, dŭm knơ̆ng bruă bi mni kơ dŭm klei mlih hdră tă mđĭ kyar mơ̆ng Việt Nam leh anăn lač, bruă ba mdah hdră mtrŭn msĕ si Hdră mtrŭn mrô 57 kơ mtrŭt mđĭ klei kreh knhâo mrâo mrang leh anăn mlih mrâo hŏng klei mbruă, hdră mtrŭn mrô 59 kơ čŏng pô ñŭ kma hŏng tar rŏng lăn, Hdră mtrŭn mrô 68 kơ mđĭ kyar bruă duh mkra êngao Knŭk kna leh anăn hdră mtrŭn 66 kơ bi mlih mrâo bruă mkŏ mjing leh anăn hluê ngă hdră bhiăn lăn čar…Dŭm klei blŭ mguôp akâo kơ Knŭk kna ba mdah klei mtô leh anăn hdră klă nik čiăng bi hrŏ êwang kpleh plah wah gưl dlông leh anăn alŭ wăl, rơ̆ng kơ klei hơĭt hlăm klei kriê dlăng hlăm lăn čar.

Blŭ hrăm hlăm klei kƀĭn, Khua Knŭk kna Phạm Minh Chính bi êdah klah čŭn boh sĭt bruă duh mkra, ala ƀuôn mơ̆ng Việt Nam leh anăn mñă ktang: Việt Nam bi klă mta kñăm đĭ kyar 8% hlăm thŭn 2025 leh anăn 2 ênoh mrô hlăm wưng kơ anăp, hlăm anăn mtrŭt mđĭ klei đĭ kyar bruă duh mkra mtah, bruă duh mkra mrô jing klei čiăng êdi, găl guôp hŏng klei đĭ kyar. Knŭk kna srăng gĭt gai dŭm phŭnm dhar bruă, alŭ wăl mjêč ngă bruă, gĭr jih ai tiê, mgaih msir djăp klei dleh dlan, bi mguôp, čŏng pô bi djŏ guôp, mbruă, kreh knhâo, tŭ dưn, hur har mlih mrâo, mbruă. Khua Knŭk kna đăo knang êpul êya knơ̆ng bruă FDI srăng lŏ dơ̆ng hrăm mbĭt hŏng Việt Nam, hrăm mbĭt mkŏ mjing bruă duh mkra mtah, bi ktưn leh anăn hơĭt kjăp, kyua klei mdrŏng sah mơ̆ng alŭ wăl leh anăn tar rŏng lăn.