Hŏng klei gĭr amâo mâo lui phung ƀuôn sang lĕ hlăm klei amâo mâo tết ôh, dŭm gưl bruă sang čư̆ êa, êpul êya bruă hlăm čar Kontum mơ̆ng kơ tết giăm sa mlan leh mkŏ mjing bruă ksiêm bi mklă, čih yap dŭm gŏ êsei dôk hlăm klei dleh dlan pioh đru tết. Tết nguyên đán Nhâm Dần thŭn anei, khădah klei ruă tưp Covid 19 ti čar Kontum adôk dleh dưi ksiêm dlăng, ƀiădah hŏng hdră êlan hdĭp thâo mdrơ̆ng hŏng klei ruă tưp, 10 kdriêk, ƀuôn prŏng hlăm čar ăt mkŏ mjing hrue đŭng điŏ, lehanăn mkŏ mjing dŭm bruă ngă hŏng ai êwa mơak mñai, čiăng bi kkuh drông thŭn mrâo mơak mñai. Lač kơ klei bruă sang čư̆ êa duh mĭn tết kơ phung ƀuôn sang, A Sip, k’iăng khua Êpul Gơ̆ng bruă ƀuôn sang să Đăk Ruông, kdriêk Kon Braih brei thâo:

“Êlâo hĭn, êpul khua kiă kriê Êpul gơ̆ng bruă ƀuôn sang, knơ̆ng bruă sang čư̆ êa să, dŭm êpul dhar bruă nga leh bruă ksiêm bi mklă čih yap dŭm gŏ êsei kƀah huă ƀơ̆ng, dôk hlăm klei dleh dlan čiăng hưn hŏng bruă Đảng, Êpul Gơ̆ng lehanăn bruă mặt trận să čiăng dưi mâo hdră đru mnơ̆ng ƀơ̆ng huă bi hmao, djăp kơ dŭm gŏ êsei dôk hlăm klei ư̆ êpa, gŏ êsei dleh dlan, čiăng kơ jih jang mnuih hlăm să Đăk Ruông hrăm mbĭt mơak mñai drông Tết Nhâm Dần hlăm thŭn 2022. Ară anei phung ƀuôn sang hlăm să Đăk Ruông lu gŏ êsei mprăp leh lu mta mnơ̆ng jăk kreh yua, grăp gŏ sang mâo mkŏ mjing drông tết mơak mñai mkiêt mkriêm lehanăn jăk yâo, bruă sang čư̆ êa să amâo mâo lui sa gŏ êsei lĕ hlăm klei ư̆ êpa ôh hlăm wưng tết”./.

2.Să Dak N’Drung, kdriêk Dak Song, čả Dak Nông mâo 4 ƀuôn mnuih djuê ƀiă, lu jing mnuih M’Nông mâo klei bi hgŭm hŏng dŭm anôk brưa mŏng čar truh kdriêk. Hlăm thŭn mrâo êgao, leh klei ruă Covid-19 bluh mâo, dŭm anôk bruă mjing nao êmuh hrăm, mđup brei mnơ̆ng, mđĭ ai mnuih ƀuôn sang hgao klei dleh dlan. Hlăm anăn, Sang phat kđi yang ƀuôn čar Dak Nông mkŏ mjing mđup brei 100 hnư mnơ̆ng (mâo ênoh êbeh 30 êklăk prăk) kơ mnuih ƀuôn sang ti Bon Bu Boong. Điểu Minh - Khua knơ̆ng bruă mặt trận să Dak Ndrung, kdriêk Dak Song brei thâo, ƀri gưl drông Tết nguyên đán Nhâm Dần, dŭm anôk bruă bi mjĕ mjing lŏ dơ̆ng nao čhưn êmuh hrăm mnuih ƀuôn sang.

            “Tết truh, să Dak Ndrung snăn mơak snăk kyua mâo anôk bruă mjĕ mjing mơ̆ng čar, kdriêk wĭt êmuh hrăm. Grăp anôk bruă hriê ti ƀuôn, mguôp prăk blei ŭn kơ mnuih ƀuôn sang. Tal dua, dŭm anôk bruă mjĕ mjing nao čhưn phung khua mduôn, khua ƀuôn leh anăn nao čhưn hŏng bruă sang čư̆ êa alŭ wăl. Mơ̆ng anăn hâo hưn mtô mblang kơ mnuih ƀuôn sang ngă bruă pla mjing, mđĭ kyar bruă duh mkra. Yuôm bhăn hĭn jing gang mkhư̆ klei ruă Covid-19, mnuih ƀuôn sang amâo bi tuôm ôh hŏng phung amâo thâo kral.

         Bi ti să krĭng taih kbưi Kông Lơng Khơng, kdriêk Kbang, čar Gialai, hŏng ai êwa drông tết Nhâm Dần mơak mñai. Êpul êdam êra jing phung knơ̆ng hlăm bruă bi mdoh ƀuôn sang êlâo kơ hruê drông thŭn bhang mrâo. Ti anei mâo anôk mtah siam, phung ƀuôn sang jih ai tiê mtrŭt mjhar, ngă bruă bi ktưn mkŏ mkra krĭng ƀuôn sang mrâo. Đinh Văn Lộc, Khua bruă êdam êra să Kông Lơng Khơng lač, wưng leh êgao, bruă êdam êra bi hgŭm leh hŏng dŭm gŏ êsei mkŏ mjing mbĕ truh êbeh 20 boh war êning kbưi hŏng sang dôk. Klei mâo 5 bĭt ƀăng tuh djah kơ alŭ, lehanăn mkra 20 boh sang mnei, sang tlô. Mprăp drông tết Nhâm Dần, êpul êdam êra să iêo jak leh mâo êbeh 20 čô êdam êra nao bi mdoh êlan klông hlăm să, pla mrâo lu ana kyâo mtah čiăng bi siam ƀuôn êlan:

“Jing khua bruă êdam êra să, hmei lŏ dơ̆ng kiă kriê, gĭt gai bruă êdam êra ƀuôn hâo hưnm iêo jak jih jang phung êdam êra nao bi mdoh war bưn, bi mdoh êlan klông hlăm ƀuôn, pưk sang doh siam. Čang hmăng, tết thŭn anei jih jang phung êdam êra dŭm boh ƀuôn thâo bi mguôp, mơak mñai, amâo mâo ngă soh hŏng klei bhiăn knŭk kna Hmei ƀuh leh mơh, klei ruă tưp Covid 19 jing dleh dlan, hmei hlăk lŏ dơ̆ng mtrŭt mjhar phung êdam êra nga jăk bruă mdrơ̆ng hŏng klei ruă tưp covid 19, boh nik hlăm wưng tết, čiăng đru kơ grăp čô mnuih, grăp boh sang ƀơ̆ng tết mơak mñai, mâo klei suaih pral nanao, duh ƀơ̆ng đĭ kyar”./.

Ti să Dă Sar, kdriêk Lạc Dương, čar Lâm Đồng, wăt tơdah hmaĭ kyua klei ruă Covid-19 ƀiădah kyua kphê mâo ênoh anăn klei hdĭp mda ala buôn mnuih ƀuôn sang djuê ƀiă ti čar rơ̆ng hơĭt kjăp leh anăn mđĭ. Hŏng klei hrăm mbĭt, bi hgŭm mơ̆ng mnuih ƀuôn sang, bruă pŏk ngă hdră kñăm mdua mđĭ kyar bruă duh mkra leh anăn gang mkhư̆ klei ruă tưp hlăm boh klei mrâo anei dưi mâo klei tŭ dưn jăk, mnuih ƀuôn sang hơ̆k mơak drông yan mnga mrâo. Liêng Jrang Ha Rô Ky, Khua Knơ̆ng bruă sang čư̆ êa să Dă Sar brei thâo:

“Yan boh mnga thŭn 2020-2021, kyua hmaĭ mơ̆ng klei ruă Covid-19 hrăm mbĭt hŏng ala čar, să Dă Sar ăt hmaĭ lu, wăt tơdah snăn, mnuih ƀuôn sang ăt kriê dlăng đang kphê mđĭ kyar jăk. Thŭn êgao hnơ̆ng boh mnga hrŏ, ƀiădah ênoh đĭ lu blư̆ mkă hŏng êlâo, anăn klei hdĭp mnuih ƀuôn sang hơĭt kjăp, bruă duh mkra ala ƀuôn đĭ kyar, mnuih ƀuôn sang hơ̆k mơak. Mbĭt hŏng dŭm hdră  hluê ngă klei kñăm mdua mđĭ kyar bruă duh mkra êjai, gang mkhư̆ klei ruă tưp êjai mơ̆ng gưl dlông, klei mnuih ƀuôn sang thâo săng kơ bruă klam hŏng êpul êya dưi mđĭ, klă sĭt bruă hluê ngă mđĭ kyar bruă duh mkra hŏng hdră gang mkhư̆ klei ruă tưp jăk, rơ̆ng dưi ngă hdră kñăm. Mơ̆ng yan kphê mâo ênoh anăn hlăm hruê yan mnga anei ai tiê mnuih ƀuôn sang mơak sơaĭ.”          

 Msĕ snăn mơh phung ƀuôn sang djăp djuê ana ti kdriêk Dakmil, čar Daknông thŭn anei drông tết hŏng klei mơak mñai, kyua boh mnga djŏ êa hlĭm hjan, lehanăn čhĭ mâo ênoh. Ti Bon Bu Dak, să Thuận An, anôk mâo êbeh 315 gŏ êsei hŏng hlăm brô 1.200 čô mnuih, lu jing mnuih Mnông. Mnơ̆ng hrui wĭt phŭn knŏng jưh knang kơ bruă pla kphê, ngă lŏ. Y Bling Jing, Khua bruă Đảng Bon Bu Dak lač, thŭn anei kphê djŏ boh mnga, lehanăn čhĭ yuôm, knơ̆ng mbông êa Bu Dak mâo lŏ mkra mđĭ, snăn dưi mâo djăp êa mđoh kơ dŭm pluh ha lŏ 2 yan, klei hdĭp phung ƀuôn sang mâo mđĭ hĭn:

“Thŭn hđăp leh êgao, thŭn mrâo truh, phung ƀuôn sang bi ktưn mđĭ kyar klei hdĭp mda. Khădah tuôm hŏng lu klei dleh dlan, ƀiădah phung ƀuôn sang ăt gĭr mghaih msir. Mbĭt hŏng anăn mâo klei đru mơ̆ng bruă Đảng, knŭk kna lehanăn bruă sang čư̆ êa alŭ wăl hmei mđing truh kơ phung ƀuôn sang. Hmei hâo hưn mtă mtăn kơ phung ƀuôn sang thâo dlăng kriê klei suaih pral, hlăm anăn hlue ngă 5 mta klei mtă čiăng dưi mâo klei êđăp ênang. Hlăm wưng tết anei msĕ mơh, čiăng răng kriê klei suaih pral kơ pô lehanăn kơ jih jang yang ƀuôn, phung ƀuôn sang hrăm mbĭt sa ai tiê mdrơ̆ng hŏng klei ruă tưp”./.