Leh bi mŭt čar, Gia Lai tal êlâo bi kƀĭn djăp ênŭm dŭm mta “dliê kmrơ̆ng - êa ksĭ - dap kngư- mnơ̆ng kriê pioh”. Ti nah Yŭ jing dap kngư liă lia hŏng “wăl dliê msĕ si hla ksŏ mtah”  jing Wăl kriê pioh mnơ̆ng hdĭp dlông rŏng lăn Dap Kngư Kon Hà Nừng, Đang dliê knŭk kna mkuôm Kon Ka Kinh,Wăl kriê pioh dliê kyâo, mnơ̆ng dhơ̆ng Kon Chư Răng. Mbĭt hŏng anăn jing dŭm anôk truh  jăk siam msĕ si čư̆ pui Čư̆ Đăng Ya, Êa Nueng, drai êa leh anăn dliê hrông, mjing klei jak iêô hŏng tue hiu čhưn khăp kơ dliê kmrơ̆ng, hiu čhưn dlăng.

Ti nah Ngŏ, wăl êa ksĭ, plao skĭ pŏk êlan hŏng êlan êa ksĭ taih êbeh 135 km, hŏng anôk truh mâo anăn knăl msĕ si Kỳ Co, Eo Gió, trăp Thị Nại. Êa ksĭ mtah, čuah kô̆ hŏng wăl hdĭp mda ti hang ksĭ prŏng čiăng mđĭ kyar hiu čhưn ênguê, mdei msăn, mjuăt asei mlei hlăm êa ksĭ leh anăn hiu čhưn dlăng.

 Êngao anăn, Gia Lai lŏ mâo boh êlam kơ dhar kreh djuê ana, mơ̆ng Wăl dhar kreh čing čhar Lăn Dap Kngư truh kơ mnơ̆ng kriê pioh amâo êdah klă msĕ si mmuñ Chòi, mmuñ Bội, klei bi čăm djuê ana, hŏng mnơ̆ng kriê pioh Čăm Pa hlăm lu anôk. Trần Việt Anh -  Khua Êpul hgŭm hiu čhưn ênguê čar Gia Lai brei thâo, anei srăng jing tur knơ̆ng kơ čar tă êlan mjing mnơ̆ng dhơ̆ng hiu čhưn ênguê ti alŭ wăl.

"Hmei srăng mkŏ mjing klei bi mguôp hŏng dŭm anôk bruă duh mkra amâo djŏ knŏng čar Gia Lai mrâo ôh ƀiădah srăng mbĭt hŏng dŭm anôk bruă duh mkra hlăm ala čar leh anăn ala tač êngao srăng duahh tour hiu čhưn čiăng mlir rŏng hiu čhưn dlăng kơ klei jăk siam hlăm êa ksĭ leh anăn dŭm klei jăk siam dap kngư”.

Thŭn 2025, hiu čhưn ênguê Gia Lai kơrŭ wĭt ktang, drông 12 êklăk tue. Klei bi kƀĭn bruă Đảng čar Gia Lai tal I (wưng 2025 - 2030) bi mklă leh hiu čhưn ênguê jing sa hlăm dŭm bruă duh mkra phŭn, kčah klei kñăm truh thŭn 2030 drông 18,5 êklăk gưl tue, hlăm anăn mâo êbeh 1,1 êklăk gưl tue ala tač êngao; mđĭ kyar hiu čhưn ênguê hlue hdră mtah, hơĭt kjăp, mâo ênoh yuôm.

Nguyễn Thị Kim Chung -  K’iăng Khua Knơ̆ng bruă dhar kreh, mjuăt asei mlei leh anăn hiu čhưn ênguê Gia Lai brei thâo: Gia Lai dưi mkŏ mjing Thŭn hiu čhưn ênguê ala čar 2026 hŏng akŏ “Gia Lai - Klei bi klin knhuah dhar kreh, lar bra mtah”, hŏng klei mâo srăng mkŏ mjing mơ̆ng mlan 3 truh mlan 12/2026.

"Knơ̆ng bruă kčĕ kơ čar mkŏ mjing leh anăn bi leh hdră mđĭ kyar hiu čhưn ênguê čar Gia Lai wưng 2025 - 2030. Hlăm anăn klă klơ̆ng hlue ngă kơ mnơ̆ng dhơ̆ng hiu čhưn ênguê, dŭm klei bhiăn hdră êlan mđĭ kyar hiu čhưn ênguê hlăm wưng kơ anăp msĕ si srăng kčĕ mkŏ mjing hdră êlan kơ mđĭ kyar hiu čhưn ênguê êpul êya, hiu čhưn ênguê lŏ hma, đru, mtô bi hriăm, mbŏ mnuih mă bruă kơ tue hiu čhưn ala tač êngao”.

Yan mnga dôk truh ti dap kngư leh anăn êa ksĭ plao ksĭ, ba wăt ai hdĭp mrâo, ai êwa mrâo kơ wăl hiu čhưn ênguê Gia Lai. Hlăm ai êwa yan mnga anăn, dliê mtah - êa ksĭ siam amâo djŏ knŏng klei jăk siam ôh, ƀiădah lŏ jing boh kdrŭt mđĭ kyar, pŏk êlan kơ hdră mđĭ kyar hơĭt kjăp krĭng lăn anei.