VOV4.Êđê - Hlăm wưng êgao, ƀuôn prŏng Ƀuôn Ama Thuôt, čar DakLak mđing mtrŭt mđĭ bruă ba yua kdrăp hâo hưn ênuk mrâo, mđing truh kơ bruă mkŏ mkra knŭk kna điện tử. Bi mlih mrô ti ƀuôn prŏng đru mguôp mđĭ klei tŭ dưn hdră mă bruă mơ̆ng anôk bruă knŭk kna, mđĭ klei ư ai mơ̆ng mnuih ƀuôn sang, mơ̆ng anôk bruă duh mkra.

Sang kdrưk kơang jing anôk 3 ama anak Y-Thanh Ƀuôn Krông, dôk ti ƀuôn Nui, să Tâm Thắng, kdriêk Čư̆ Jŭt, ngă bruă bi ktlah, mdrao klei ruă tưp Covid-19. Y-Thanh Ƀuôn Krông brei thâo, êjai mâo klei mtŭk, êngoh hlơr, ñu čŏng nao ti anôk bruă mdrao mgŭn să ngă klei ksiêm mkă pral leh anăn ƀuh hlăm pô mâo kman. Pŏk phai klei ksiêm mkă kơ jih gŏ sang, 3 čô mâo klei ruă tưp Covid-19 mâo phung knuă druh bruă mdrao mgŭn mtô lač brei mdrao tĭ sang. Knŏng hjăm mô̆ ñu amâo mâo klei ruă  mâo găp djuê dăp brei anôk dôk. Leh sa hruê kăm mdrao mgŭn, anak êkei ñu dưi hlao leh, ñu leh anăn anak mniê ñu ăt mâo leh klei hơĭt. Y-Thanh lŏ brei thâo: Kâo jing F0, 2 ama anak kâo dôk ti sang, mô̆ dôk ti sang amai. 2 ama anak hmei mâo klei hơĭt kriê dlăng klei suiah pral leh anăn hluê ngă djŏ 5 klei mtă. Mâo klei hơĭt kơ klei suaih pral hlăm hruê mmông bi ktlah, amâo lŏ mâo ôh klei hyưt. Kâo hmăng hmưi phung ayŏng adei tơdah tăp djŏ hĕ Covid-19 srăng gĭr hluê ngă djŏ 5 klei mtă, mdjiê kman leh anăn amâo kbiă hiu ôh mơ̆ng ƀuôn sang

Aê mdrao Quản Xuân Huân, ti anôk bruă mdrao mgŭn să Tâm Thắng brei thâo, mơ̆ng knhal jih thŭn truh kơ ară anei, kluôm să Tâm Thắng mâo êbeh 800 čô mâo klei ruă tưp Covid-19. Ară anei păt čiăng jih hlao leh, knŏng dôk mă 233 čô dôk mdrao ti sang. Dŭm alŭ ƀuôn ăt dôk rơ̆ng lu êpul Covid yang ƀuôn, bi mguôp kjăp hŏng phung knuă druh bruă mdrao mgŭn ngă bruă kriê dlăng, mtô lač kơ phung F0 amâo mâo klei bi knăl mâodah djhul dôk mdrao ti sang. Grăp alŭ ƀuôn srăng mkŏ mjing lu êpul. Tơdah hmao ƀuh sa čô jing F0 leh anăn mdrao ti sang, anôk bruă mdrao mgŭn srăng mtô lač klei kriê dlăng, mdrao mgŭn,si ngă mnăm êa drao kơ êpul covid yang ƀuôn thâo ktuê dlăng leh anăn mkăp brei êa drao kơ mnuih ruă. Leh anăn êpul êya bruă mdrao mgŭn alŭ ƀuôn, knuă druh hlăm ƀuôn, ngă bruă bi ktlah, kwang dar dŭm gŏ sang mâo mnuih ruă, amâo brei tưp tar anôk mkăn.

Ti alŭ wăl bi knông hŏng ƀuôn prŏng Ƀuôn Ama Thuôt, mnuih ƀuôn sang dôk hdĭp mda ktuê êlan dơ̆ng mrô 14, lŏ mâo 1 anôk bruă tuh tia ti čar Dak Nông, să Tâm Thăng jing anôk mnia mblei Prŏng, jing klei găl kơ klei ruă tưp Covid-19 bluh đĭ hmar. Trần Thế Quang, khua bruă sang čư êa să Tâm Thắng brei thâo, să mâo êbeh 15.300 čô mnuih ƀuôn sang, hlăm anăn mnuih djuê ƀiă mâo 30%. Klei hduĭp mnuih ƀuôn sang mâo lu klei dleh dlan jing sa hlăm dŭm klei kpăk hlăm bruă gang mkhư̆ klei ruă tưp Covid-19. Hruê mmông klei ruă tưp bluh đĭ ktang, mâo hruê hlăm ƀuôn mnuih djuê biă hmâo ƀuh truh kơ 60 čô mnuih ruă mrâo.

Mgaih msir dŭm klei dleh dlan hlăm mnơ̆ng yua, să iêu mthưr leh wăt kơ yang ƀuôn hrăm mbĭt hŏng dŭm klei bi hmô kriê dlăng F0 Amâo mâo klei bi knăl amâodah djhul mdrao ti sang. Anăn jing dŭm gŏ sang srăng mkăp sa boh sang kơ phung mâo klei ruă dôk, amâodah brei F1 nao dôk ti hma, jang sang dôk mâo ênŭm klei găl čiăng kơ F0 bi ktlah. Tơdah ênoh F0 jing lu êdi, să hlŏng mă yua sang jing anôk mdrao kơ phung ruă. Trần Thế Quang brei thâo, bruă rơ̆ng mnơ̆ng yua kơ mnuih ruă čiăng kơ diñu mâo klei hơĭt êjai mdrao mgŭn leh anăn knang kơ yang ƀuôn hŏng dŭm ai dưi dhar kreh. Dŭm anôk mdrao mgŭn ti sang yang ƀuôn hmei mâo klei iêo mkrum dŭm ai dưi yang ƀuôn bi mguôp braih huă, mnơ̆ng yua leh anăn mtô kơ phung F0 brei diñu čŏng tŭk knă, kriê dlăng hdơ̆ng pô. Bi hŏng dŭm êpul gŏ sang srăng knang kơ ai dưi mơ̆ng gŏ sang leh anăn yang ƀuôn, phung F1 srăng mơĭt mnơ̆ng ƀơ̆ng huă, mnơ̆ng yua kơ phung F0. Bi tơdah hlăm sa gŏ sang mâo lu F0 srăng mtô kơ gŏ sang anăn čŏng tŭk knă, kriê dlăng hdơ̆ng pô, alŭ wăl srăng đru brei dŭ mta mnơ̆ng yua mjêč. Mâo blư̆ sang yang ƀuôn hmei mdrao kơ 20 -25, hlăm sa gŏ sang mâo kah mnar 6 čô, anăn jing hŏng dŭm gŏ sang mnuih djuê ƀiă đuč, Bi hŏng phung yuăn dưi mâo klei rơ̆ng ƀiă. 

Ăt msĕ sơnăn ti să Tâm Thắng, klei bi hmô mdrao kơ phung mâo klei ruă tưp Covid-19 hlăm êpul êya mnuih djuê ƀiă dưi bi lar leh boh tŭ hlăm kluôm kdriêk Čư̆ Jŭt, čar Dak Nông. Hluê si Aê mdrao Bùi Thị Minh Nghĩa, khua kiă kriê anôk bruă mdrao mgŭn kdriêk Čư̆ Jŭt, dŭm klei bi hmô anei djŏ hŏng klei mưng mơ̆ng mnuih djuê ƀiă ăt msĕ hŏng dŭm klei dleh dlan hlăm bruă duh mkra mơ̆ng diñu. Bruă mdrao kơ phung F0 hlăm êpul êya yang ƀuôn dưi bi hrŏ leh klei ktrŏ kơ bruă mdrao mgŭn. Truh kơ ară anei, kluôm kriêk mâo giăm 7000 čô mnuih ruă, hlăm anăn păt čiăng jih dưi mdrao hlao leh, ară anei knŏng dôk giam 100 čô dôk mdrao ti sang êa drao, êbeh 2000 čô dôk mdrao ti sang.

Hruê mmông giăm anei. Kah knar grăp hruê Čư̆ Jŭt hmao ƀuh hlăm brô 200 čô mnuih ruă mrâo. Klei năng mơak jing ênoh mnuih ruă dôk mdrao ti anôk bruă mdrao mgŭn jing ƀiă êdi. Aê mdrao Bùi Thị Minh Nghĩa brei thâo, bruă gang khư̆ klei ruă tưp mâo dŭm klei găl kyua kdriêk dưi tlŏ mgang ênŭm leh vaccine aruăt tal 3 kơ mnuih mơ̆ng 18 thŭn kơ dlông, leh anăn mnuih ƀuôn sang mâo klei thâo săng, klei thâo hlăm bruă gang mkhư̆ klei ruă tưp Covid-19. Khădah sơnăn, ƀiădah kdriêk mprăp ênŭm leh kdrăp yua čiăng drông djum, mdrao mgŭn kơ 300 čô mnuih ruă leh anăn dăp ai dưi bruă mdrao mgŭn tơdah ênoh mnuih ruă đĭ lu. Phung ngă bruă mdrao mgŭn ăt mâo pô djŏ klei ruă, ênoh bruă mă đĭ lu êjai ênoh mnuih mă bruă hrŏ, kyuanăn hmei dăp nanao mnuih mă bruă čiăng rơ̆ng kơ bruă gang mkhư̆ klei ruă tưp. Ară anei hmei čih leh hră anăn phung aê mdrao leh jih thŭn mă bruă, tơdah mjêč srăng iêo mthưr phung anăn nao đru.

Hŏng klei nao hgŭm wăt yang ƀuôn, bruă sang čư̆ êa alŭ wăl mbĭt hŏng bruă mdrao mgŭn, kdriêk Čư̆ Jŭt, čar Dak Nông dôk čŏng pô tui ngă dŭm hdră êlan djŏ guôp êđăp ênang rơ̆ng klei suiah pral kơ mnuih ƀuôn sang ti anăp klei ruă tưp covid-19./.