VOV4.Êđê- Hlăm wưng êgao, lu phung mda asei čar Gia lai mâo phung mplư ba yua kdrăp mrâo hlăm internet mplư nao mă bruă ti Campuchia hlăm êlan phung hiu mplư, leh anăn gŏ sang duah dŭm êklăk prăk čiăng bi tui. Kahn ksiêm čar Gia Lai mtă kơ mnuih ƀuôn sang brei răng hŏng klei mplư mrâo mơ̆ng phung hiu mplư.

Dôk hlăm sa boh sang tĭ rưč ti êpul mrô 4, wăl krah Kon Dơng, kdriêk Mang Yang, čar Gialai, amai N.T.L rôč êa ală hia kơ anak êkei ñu Đ.V.T 15 thŭn ară anei ka thâo bĭt ôh djiê amâodah hdĭp. Mĭndah čiăng duah prăk đru mdul hŏng amĭ ama, knhal jih mlan 3 leh êgao, hmư̆ hing arăng bi lar hlăm ala pŏk yang ƀuôn. T. đĭ êdeh mdiăng tue đuĕ nao kơ ƀuôn prŏng Hồ Chí Minh, lehanăn mâo sa êpul atăt ba ñu lačdah nao mă bruă ti Campuchia. Truh krah mlan 4 T. iêo đĭng blŭ, čih mơĭt hlăm Zalo lač, phung hlăm anăn mgô̆ ñu hŏng êlan hla pŏk yang ƀuôn duah mplư mnuih ti Việt Nam nao mă bruă ti Campuchia. Tơdah dưi, hŏng grăp čô mnuih T. srăng mâo mnga truh 30 êklăk prăk.

Amĭ ama T rŭng răng kơ klei êđăp ênang anak êkei ñu ti ala čar arăng

            10 hrue êdei kơ anăn, T. lŏ čih mơĭt akâo găp djuê dŏng đru ñu mơĭt brei 150 êklăk prăk hlăm anăn Quách Thanh Tùng čiăng kơ arăng phưi ñu wĭt. Kyua ƀun ƀin knap mñai, truh kơ ară anei, ung mô̆ amai L ăt ka thâo bĭt ôh êlan duah sa ênoh prăk prŏng msĕ snăn čiăng nao mtui anak pô:

"Găp djuê dleh dlan amâo mâo prăk mơĭt kơ anak ôh, anak kâo čih hlăm zalo lač phung dih čăm biêng, bi ư̆ ñu dua hrue leh. Ară anei akâo kơ Kahan ksiêm Việt Nam, Campuchia, Anôk bruă bi ala knŭk kna nao mtlaih brei anak kâo mâo wĭt kơ Việt Nam hŏng klei êđăp ênang”.

Trung tá Đinh Văn Sơn k’iăng khua adŭ bruă kahan ksiêm hla pŏk, lehanăn bi kdơ̆ng hŏng phung ngă soh hlăm kdrăp mrâo mrang mơ̆ng kahan ksiêm čar Gialai brei thâo, ka bŏ mơh 6 mlan akŏ thŭn 2022, anôk bruă anei mâo tŭ mă leh truh 43 klei hưn lĕ hlăm klei arăng mplư hlăm hla pŏk, hŏng ênoh prăk luič liê jih jang êbeh 26 êklai prăk. Êngao kơ dŭm mnêč mplư êlâo dih msĕ si duah mnuih ngă bruă nao čhĭ mnơ̆ng, iêo jak duh bi liê prăk hlăm êlan ala pŏk, ngă mgưt phung knuă druh hưn mthâo kơ klei đŭ bi kmhal... snăn ară anei lŏ ƀuh sa mnêč mrâo jing mplư nao mă bruă ti Campuchia hŏng ênoh prăk mlan mơ̆ng 800 - 1000 dolar.

Klei hdĭp T dleh dlan

Mâo klei phung lĕ hlăm klei arăng mplư hưn, leh truh kơ Campuchia, diñu arăng ba hlăm dŭm anôk jing sang mâo phung khêč kiă kriê. Bruă diñu ngă grăp hrue jing yua đĭng blŭ iêo wĭt kơ Việt Nam duah mplư mnuih hlăm ala čar lačdah nao mă bruă ngă dŭm mta bruă čhĭ mnơ̆ng, iêo jak klei duh bi liê, bi jak nao ngă bruă ti Campuchia... Tơdah amâo mâo djăp ôh hŏng ênoh diñu kčah diñu srăng bi kmhal ƀiă êdi 1000 dolar, tuôm hŏng klei arăng čăm biêng, bi ư̆ leh kơ anăn brei iêo kơ mnuih hlăm găp djuê duah prăk nao mtui. Diñu knŏng phưi tha tơdah găp djuê mâo leh ênŭm ênoh kčah bi tui asei mơ̆ng diñu.

 Trung tá Đinh Văn Sơn mtă kơ jih jang phung ƀuôn sang brei mâo klei răng ti anăp klei duah mplư bŏ hŏng klei mnêč lačdah mâo bruă hdjul, lehanăn prăk mlan lu hlăm internet, kñăm čiăng mplư arăng mơ̆ng phung soh jhat:

“Phung ƀuôn sang čiăng duah bruă knuă mă, snăn bi ksiêm hĕ bi nik, čiăng nao mă bruă kơ ala tač êngao snăn nao kơ knơ̆ng bruă mnuih ngă bruă phung knap mñai mâo klei ktrâo atăt, kčĕ đru. Dŭm gŏ sang mâo anak aneh hlăk thŭn mă bruă snăn mâo klei bi ksiêm nik, bi đru hlăm klei duah bruă knuă mă bi djŏ guôp, răng đăm lĕ ôh hlăm klei phung jhat mplư”./.

Pô mblang: Y-Khem Niê