VOV4.Êđê - Aguah mbruê, phŭn bruă mtô mjuăt bi hriăm mkŏ mjing leh klei kƀĭn trông online kơ bruă mkŏ mjing klei bi lông bi ruê̆ klei hriăm gưl tlâo thŭn 2022. Nao hlăm klei kƀĭn mâo êpul gĭt gai klei bi lông mơ̆ng 63 čar, ƀuôn prŏng leh anăn phung bi ala dŭm phŭn, dhar bruă, anôk bruă djŏ tuôm. Klei bi lông bi ruê̆ klei hriăm gưl tlâo thŭn anei srăng mkŏ mjing ti hruê 7 leh anăn 8/7.

Ară anei, phŭn bruă mtô mjuăt bi hriăm ba mdah leh ênŭm dŭm hră mơar gĭt gai, ktrâo lač kơ bruă mkŏ mjing klei bi lông bi ruê̆ klei hriăm gưl tlâo thŭn 2022. Yap truh kơ 5 mmông hruê 5/6, dŭm anôk bruă ngă djăp leh bruă bi klă hră akâo bi lông hŏng ênoh êbeh 1 êklăk 2 êbâo čô bi lông. Hưn mdah hlăm klei kƀĭn trông, dŭm alŭ wăl brei thâo, bi ruê̆ leh klei hriăm hlăm thŭn kơ hđeh sang hră adŭ 12 hluê si hdră kčah leh anăn ară anei dôk rơ̆ng bruă ksiêm wĭt. Dŭm alŭ wăl mkŏ mjing leh êpul gĭt gai klei bi lông gưl čar, kdriêk čiăng mkŏ mjing klei bi lông jăk hĭn. Dŭm mta bruă mprăp kơ mnơ̆ng yua, mnuih mă bruă kơ klei bi lông dôk dưi mkŏ mjing, rơ̆ng mkŏ mjing sa gưl bi lông hlăm kluôm ala hluê si hdră kčah mâo leh.

Y-Ƀel pô mblang