VOV4.Êđê -  Hruê 26/2, dŭm anôk bruă duh mkra hiu čhưn ênguê, atăt tuê hiu čhưn čih leh hră ba m’ĭt kơ Khua knŭk kna hưn mthâo mlan 2 jing “Wưng găl pŏk ƀăng hdră hiu čhưn ênguê quốc tế ti Việt Nam”. Hluê si anôk bruă duh mkra hiu čhưn ênguê, ară anei, Việt Nam dôk hluê ngă hdră drông tuê hiu čhưn ênguê quốc tế hlăm 7 alŭ wăl (5 alŭ wăl hlăm wưng tal 1 lehanăn lŏ thiăm mbŏ 2 alŭ wăl ti wưng tal 2). Khă snăn, leh 2 mlan lông hluê ngă mbĭt hŏng dŭm klei ba mgrơ̆ng, mbĭt hŏng klei kčah mtrŭn kjăp kơ phung tuê lehanăn anôk bruă hiu čhưn ênguê, anôk bruă êlan phiơr nao hgŭm hlăm hdră anei, truh kơ ară anei Việt Nam dưi tŭ drông hlăm brô 8.500 čô tuê hiu čhưn. Kyua anăn, anôk bruă duh mkra tĭng dlăng, brei mâo hdră mkra mlih pral hlăm klei kčah mtrŭn, hdră mtrŭn čiăng djŏ hŏng boh klei mrâo. Klei bi mklă pŏk ƀăng anôk bruă hiu čhưn ênguê quốc tế mơ̆ng Knŭk kna, Khua knŭk kna jing sa klei găl čiăng lŏ “Bi hdĭp” dŭm anôk bruă duh mkra lehanăn ăt “Bi hdĭp” 2 êklăk 500 êbâo čô mnuih mă bruă hlăm anôk bruă anei./.

H’Nêč pô mblang