Jing ƀuôn prŏng hlăm čar Dak Lak ƀiădah ƀuôn prŏng Ƀuôn Ama Thuôt, ênoh êdeh kai – êdeh kang êran hlăm êlan dơ̆ng mâo truh dŭm êbâo boh, boh nik ti dŭm să nah êngao ƀuôn prŏng. Y-Thơm Kênh, alŭ 1, să Čư̆ Êbur, ƀuôn prŏng Ƀuôn Ama Thuôt brei thâo, khădah pô mâo djăp klei găl čiăng blei sa boh êdeh prŏng, ƀiădah ñu ăt yua êdeh kang kyua klei găl mơ̆ng êdeh anei. Êngao mdiăng mnơ̆ng, êdeh kang lŏ yua hlăm bruă kai lŏ hma tơdah dưi mkŏ dưm kdrăp mnơ̆ng. Y Thơm brei thâo, ñu ƀuh êdeh kang hđăp amâo rơ̆ng klei êđăp ênang, kyua anăn êlâo kơ blei êdeh mrâo, ñu hmư̆ leh klei mtă mơ̆ng êpul kahan ksiêm să, duh bi liê đĭ giăm mkrah wah čiăng blei sa boh êdeh jăk, êđăp ênang hĭn.

“Êlâo kơ blei êdeh anei, kahan ksiêm lač jih leh, brei mkŏ pui xinhan, akâo êlan, nah điâo nah hnuă. Jih jang kâo duh truh 125 êklăk prăk, êdeh anei amâo guôn kwă ôh, mâo kdrăp kăp gư̆ anăn yơ̆ng yơh.

Boh sĭt ti să Čư̆ Êbur, čar Dak Lak ăt msĕ mơh dŭm alŭ wăl mkăn ti Lăn dap kngư, ƀiă snăk êdeh kang mâo pui xinhan, còi. Hlăm dŭm êtuh êbâo boh êdeh snei, knŏng mâo ƀiă êdeh yua dŭ mdiăng mnơ̆ng lŏ hma, mnơ̆ng yua kơ bruă, mnơ̆ng mdiăng dŭm mta yua hlăm bruă rŭ mdơ̆ng… mâo pô êdeh mđing kơ klei êđăp ênang. Lu hlăm ênoh anăn ngă bruă hluê yan, pui còi lĕ jih, luič klei êđăp ênang, grăp thŭn mâo nanao klei truh hlăm êlan klông ngă djiê mnuih. Lu klei truh hlăm êlan klông djŏ tuôm kơ êdeh kang anei lu jing mâo hlăk adiê tlam mmăt, hlăk êdeh anei păt dah drei amâo thâo ƀuh ôh tơdah adiê mmăt. Čiăng bi hrŏ klei truh hlăm êlan klông, mơ̆ng akŏ thŭn 2024, kahan ksiêm êlan klông lehanăn kahan ksiêm să ti 2 čar Dak Lak, Dak Nông mkŏ mjing leh hdră mƀlir decal guh mngač hlăm adiê mmăt kơ dŭm boh êdeh kang hlăm alŭ wăl, mâo lu pô êdeh nao hgŭm. Hluê si Đại úy Bùi Mạnh Tuấn, Kơiăng khua Kahan ksiêm să Čư̆ Êbur, ƀuôn prŏng Ƀuôn Ama Thuôt, čar Dak Lak, mƀlir decal guh mngač hlăm adiê mmăt amâo djŏ knŏng jing hdră msir ƀiădah lŏ đru mđĭ hdră mtô mblang kơ klei răng mgang êđăp ênang êlan klông hŏng êdeh kang.

"Bruă mƀlir decal anei jing sa hdră čiăng bi tuôm hŏng mnuih ƀuôn sang mơh. Mơ̆ng hdră mƀlir decal anei čiăng mtô mblang, mtrŭt mjhar, iêu mthưr mnuih ƀuôn sang čŏng pô mprăp pui, còi… mđĭ hdră msir răng mgang klei êđăp ênang hlăm bruă ba yua êdeh anei kñăm ba wĭt boh tŭ dưn. Bruă anei srăng dưi ngă ƀrư̆ ƀrư̆, mkŏ mjing nanao čiăng bi hrŏ tuič hnơ̆ng klei truh hlăm êlan klông.

Ti 5 čar krĭng Lăn dap kngư ară anei mâo hlăm brô 200.000 boh êdeh kang. Bruă mƀlir decal guh mngač hlăm adiê mmăt kơ mta êdeh anei dưi hluê ngă mơ̆ng thŭn 2019, ti dŭm să. Akŏ thŭn anei, hdră anei dưi pŏk ngă ti djăp anôk, mguôp hŏng hdră mtô mblang kơ dŭm klei kčah mtrŭn, klei bhiăn tơdah êrô hlăm êlan klông, boh nik jing bruă amâo êran êgao hnơ̆ng; amâo mtiŏ, găn kŏ êdeh, tah êlan amâo djŏ hdră. … Thượng tá Phạm Quốc Lập – Kơiăng khua Anôk bruă kahan ksiêm êlan klông čar Dak Nông brei thâo, boh sĭt anei jing hdră msir ba wĭt klei tŭ dưn:

"Mƀlir decal guh mngač hlăm adiê mmăt kơ êdeh kang čiăng kơ mnuih êrô hlăm êlan thâo ƀuh mâo êdeh dôk êran ti anăp kñăm gang mkhư̆, bi hrŏ klei truh hlăm êlan. Mbĭt anăn jing mđĭ hdră mtô mblang, mtrŭt mjhar, msir mghaih êdeh amâo djăp hnơ̆ng čuăn găn êrô hlăm êlan klông kñăm bi hrŏ klei truh.

Khădah mâo leh boh tŭ dưn hlăm bruă mđĭ klei êđăp ênang mơ̆ng êdeh kang tơdah êrô hlăm êlan klông adiê mmăt, ƀiădah bruă mƀlir decal guh mngač hlăm adiê mmăt kơ êdeh anei amâo djŏ jing hdră msir h’ĭt kjăp ôh. Jing êdeh mkăp lu êdi kơ bruă pla mjing ngă lŏ hma, êdeh kang jing êdeh dưi ba yua nanao hlăm adiê mđiă không amâo dah hjan kdlŭt, tlă dhan kyâo, dŭm pŏk decal ênưih mơh kpŏk đuê̆ lehanăn amâo lŏ dưi yua. Čiăng bi hrŏ klei truh hlăm êlan klông, êdeh kang ti Lăn dap kngư brei mâo klei ksiêm dlăng kjăp dŭm mta čuăn kñăm rơ̆ng klei êđăp ênang, dơ̆ng mơ̆ng anôk bruă mkra êdeh kang mtam./.