VOV4.Êđê- Mbĭt hŏng phung bi lông kluôm ala, ti Lăn Dap Kngư phung bi lông hriăm jih gưl 3 thŭn 2022 nao leh ti anôk bi lông ngă hră mơar čih anăn bi lông tlam mbruê 6/7 leh anăn aguah anei mŭt hlăm klei bi lông tal êlâo, klei hriăm ngữ văn. Ti Dak Lak, lu phung hđeh dưi êmuh brei thâo hơĭt ai tiê mŭt hlăm klei bi lông. Khă gơ̆ lu blư̆ bi mlih boh klei hriăm ti sang hră jing online leh anăn mơ̆ng online lŏ nao ti sang hră kyua hmaĭ mơ̆ng klei ruă Covid-19, hmaĭ kơ bruă hriăm hră hŏng hđeh adŭ 12, ƀiădah hŏng klei digơ̆ čŏng gĭr leh anăn phung nai jih ai tiê bi hriăm hlăm wưng êgao, lu phung hđeh sang hră brei thâo pô mprăp leh klei hriăm, ai tiê jăk nao hlăm klei bi lông anei. Klei bi lông hriăm jih gưl 3 thŭn anei, čar Dak Lak mâo êbeh 20.400 čô čih anăn bi lông ti 32 anôk bi lông.

Klei bi lông jih gưl 3 thŭn anei, čar Lâm Đồng mâo leh êbeh 14 êbâo čô hđeh nao bi lông. Čiăng kơ klei bi lông mâo klei jăk găl, djŏ klei bhiăn, čar mâo dăp leh truh 38 anôk bi lông, hŏng 269 boh adŭ bi lông, hlăm anăn mâo 6 boh adŭ mkruôp ti dŭm kdriêk, ƀuôn prŏng hlăm čar. Êngao kơ klei hyuă hĭn bruă răng mgang klei ruă tưp, klei bi mdoh mnơ̆ng ƀơ̆ng, klei êđăp ênang yang ƀuôn, êđăp ênang êlan klông kơ hđeh nao bi lông, čar Lâm Đồng kčĕ leh kơ dŭm bruă sang čư̆ êa hlăm čar đru bi pral kơ hđeh mâo klei dleh dlan, kyuadah hlăm wưng bi lông anei djŏ hlăm gưl mâo lu tue hiu čhưn ênguê, snăn bruă răng mgang klei êđăp ênang êlan klông jing yuôm bhăn kơ hđeh nao bi lông./.

Mơ̆ng aguah 6/7, Bruă êdam êra čar Gia Lai mkŏ mjing knăm trŭn ngă bruă hdră “Đru kčĕ - đru kơ yan bi lông” thŭn 2022. Kñăm đru kơ hđeh leh anăn gŏ sang phung bi lông hlăm klei bi lông hriăm jih gưl 3 thŭn 2022, Anôk bruă gĭt gai hdră “Đru kčĕ- đru kơ yan bi lông” čar Gia Lai mkŏ mjing leh 39 êpul phung êdam êra ba anăp hŏng 292 čô čŏng ngă bruă.

Phung êdam êra čar Gia Lai nao leh ti dŭm anôk bi lông čiăng kčĕ, đru kơ klei bi lông hriăm jih gưl 3 ala čar

Phung nao đru hŏng bruă klam: Hưn mthâo sang jưh amâo mă prăk, sang jưh ênoh êlưih, anôk huă mnăm man dưn, rơ̆ng doh kơ phung bi lông leh anăn găp djuê phung bi lông; đru ba hđeh sang hră nao ti anôk bi lông, đru kơ phung hđeh mâo klei hdĭp dleh dlan; mbha čhiăm guôm ƀô̆, êa mnăm amâo mă prăk kơ hđeh bi lông. Leh trŭn ngă bruă, phung đru pral nao ti anôk bi lông čiăng hgŭm hlăm hdră “đru kčĕ - đru” kơ phung bi lông./.

                                               Pô mblang: Y-Khem Niê -H’Zawut Ƀuôn Yă