VOV4.Êđê - Tlam hruê 13/10, Êpul hgŭm phung duh mkra mnia blei čar Dak Lak bi hgŭm hŏng Êpul hgŭm bruă duh mkra mnia blei čar Dak Lak mkŏ mjing Hdră bi tuôm kkuh drông hruê phung duh mkra Việt Nam 13/10. Khua gĭt gai Êpul hgŭm phung duh mkra čar hưn mdah boh klei ngă bruă hlăm 9 mlan thŭn 2022. Dlăng knăm bi klă klei hgŭm kluôm plah wah Êpul hgŭm duh mkra čar Dak Lak leh anăn Êpul hgŭm phung duh mkra mda asei čar Dak Lak. Ară anei Dak Lak mâo giăm 11 êbâo 800 anôk bruă duh mkra ngă bruă, dôk tal 22 kluôm ala leh anăn tal 2 krĭng Lăn Dap Kngư.

Hŏng klei đĭ kyar pral kơ ênoh, phung mă bruă mnia blei, anôk bruă duh mkra mâo lu klei đru mguôp kơ klei đĭ kyar bruă duh mkra ala ƀuôn ti alŭ wăl. Hlue si Huỳnh Văn Dũng, Khua Êpul hgŭm bruă duh mkra čar Dak Lak, mơ̆ng akŏ thŭn truh ară anei Dak Lak mkŏ mjing mrâo êbeh 1 êbâo anôk bruă duh mkra, đĭ giăm 26% mkă hŏng wưng anei thŭn dih. Klei đĭ kyar anei srăng mjing thiăm ai ktang kơ êpul êya duh mkra Dak Lak đru mguôp hlăm klei đĭ kyar bruă duh mkra čar./.

Ƀri bi hdơr hrue phung duh mkra Việt Nam, tlam mbrue, ti ƀuôn prŏng Kontum, knơ̆ng bruă sang čư̆ êa čar Kontum mkŏ mjing klei trông čhai tal 2 hŏng phung duh mkra, kñăm mghaih msir djăp mta klei dleh dlan, tui duah hdră êlan mkra jăk hlăm čar. Blŭ hrăm ti anôk bi kƀĭn Nguyễn Hữu Tháp, k’iăng khua knơ̆ng bruă sang čư̆ êa čar mâo klei bi mni kơ phung duh mkra gĭr leh jih ai tiê găn klei dleh dlan lŏ bi kơrŭ bruă duh mkra leh klei ruă tưp. Hŏng klei klă mngač, hdră bi trông mă bruă kñăm bi kjăp klei lŏ kơrŭ wĭt, ksiêm dlăng hdră êlan mă bruă bi djŏ hlăm klei duh mkra mnia mblei hlăm čar./.

VOV TâyNguyên/ Pô mblang: H’ Zawut Byă + Y-Khem Niê