VOV4.Êđê - Hruê anei 16/2, 2.656 čô êdam êra mơ̆ng čar Gia Lai srăng nao mŭt kahan leh anăn kahan ksiêm yang ƀuôn. Truh mmông anei, phung êdam êra mâo leh ƀô̆ mta ti anôk kčah čiăng ksiêm mkă pral Covid-19 leh anăn mă mta ksiêm mkă hŏng RT-PCR. Ênoh mnuih ƀuôn sang anei dưi jao kơ dŭm anôk bruă: Êpul kahan3, Êpul kahan5, kahan ksiêm čar, Anôk bruă gĭt gai kahan răng mgang knông lăn čar leh anăn Anôk bruă gĭt gai lĭng kahan čar. Hluê si ênoh ksiêm yap, ênoh mnuih nao mŭt kahan thŭn anei mâo gưl hriăm gưl 2, gưl 3 mâo giăm 80%; gưl hriăm gưl krah, gưl prŏng mâo êbeh 1,4%, phung êdam êra mâo êbeh 76%, mâo 22 čô mnuih jing Đảng viên. Thŭn anei, hlăm ênoh 2.250 čô êdam êra nao mŭt kahan mâo 61% čô mnuih djuê ƀiă. Čiăng kơ phung êdam êra hơĭt ai tiê nao mŭt kahan, dŭm alŭ wăl mkŏ mjing klei êmuh hrăm, mđĭ ai, kƀĭn hluê ngă jăk hdră êlan đru nah tluôn- êpul lĭng kahan.

Thŭn 2022, čar Lâm Đồng dưi jao hnơ̆ng čoh čuăn ruah mă leh anăn iêo mthưr 1.150 čô mnuih ƀuôn sang êkei hlăm ênuk thŭn nao kahan. Hnơ̆ng čoh čuăn klei ruah mă, iêo mthưr dưi tui ngă hluê si klei bhiăn nao kahan thŭn 2015, rơ̆ng djăp ênŭm hnơ̆ng čoh čuăn, hnơ̆ng tŭ jăk, rơ̆ng klei mkŏ mjing lĭng kahan hlăm wưng aguah tlam mrâo, mkŏ mjing ai dưi phung knuă druh nah gŭ kơ dŭm alŭ wăl krĭng taih kbưi. Čiăng tui ngă mâo boh tŭ dưn bruă ruah mă, iêo mthưr mnuih ƀuôn sang nao kahan thŭn 2022, êpul gĭt gai lĭng kahan dŭm gưl mâo leh klei kčĕ hŏng bruă sang čư êa dŭm gưl mkŏ mjing klei nao bi klă truh kơ grăp să, ƀuôn hgŭm, wăl krah, sang hră gưl 3, anôk bruă mtô mjuăt klei ngă bruă hlăm alŭ wăl čar kơ jih jang mnuih ƀuôn sang ênŭm leh 17 thŭn. Bruă ruah mă lĭng kahan dưi mkŏ mjing mâo ênŭm ênoh čuăn leh anăn rơ̆ng kơ hnơ̆ng tŭ jăk hluê si ai tiê yang ƀuôn ngă phŭn, mtăp mđơr, klă mngač, êđăp ênang, mkiêt mkriêm, yap yuôm bhăn bruă klam mơ̆ng grăp êpul êya, grăp čô kñăm mđĭ hnơ̆ng tŭ jăk bruă ruah mă kahan.

Hluê si hdră kčah, 170 čô djŏ mŭt kahan mơ̆ng ƀuôn prŏng Kon Tum, čar Kon Tum dưi dăp anôk dôk sa anôk ti Anôk bruă mjuăt bi hriăm, mơ̆ng hruê 11/2 truh hruê jao tŭ mă kahan thŭn 2022. Hlăm wưng anei, phung djŏ mŭt kahan dưi hgŭm hlăm klei hriăm mjuăt msĕ si mjuăt ktang asei mlei aguah ưm, 16 klei mjuăt asei mlei aguah, klei bhiăn kahan, klăp băn mŭng, hriăm mmuiñ leh anăn khăt ƀŭk hlăm êpul kahan; mbĭt anăn mkŏ mjing dŭm klei hlăp lêñ, hlăp mbŭl, mjing ai êwa hơ̆k mơak kơ phung êdam êra êlâo kơ nao mŭt kahan. Hŏng klei gĭr, jih ai tiê mơ̆ng gưl bruă Đảng, bruă sang čư̆ êa leh anăn Êpul kahan kiă kriê kahan ƀuôn prŏng Kon Tum hlăm bruă kriê dlăng, bi ktlah hjăn phung êlâo kơ mŭt kahan, srăng đru mguôp čiăng kơ čar Kon Tum bi leh jăk bruă ruah kahan thŭn 2022.

 H’Zawut, Y-Bel pô mblang