VOV4.Êđê- Dŭm čar krĭng Lăn Dăp Kngư mâo êbeh 2.000 knơ̆ng mkăp êa hŏng ênhă truh kơ dŭm pluh êbâo ha. Bruă dưn yua dŭm knơ̆ng mkăp êa pioh rông kan hdang leh anăn dŭm mta mnơ̆ng dhơ̆ng hlăm êa dôk mâo klei kpăk êjai dưn yua dŭm mta hlăm klei bhiăn knơ̆ng mkăp êa thŭn 2017, hdră mtrŭn mrô 67 leh anăn hdră mtrŭn mrô 96 thŭn 2018. Dŭm êbâo ha ênao êa mâo klei lui mang kyua amâo mâo ênŭm klei găl brei mưn rông kan hdang.

Nguyễn Trọng Nhi kriê dlăng ênao mgơ̆ng êa Vạn Xuân mâo ênhă hlăm brô 8ha ti alŭ 9, wăl krah Dak Mil, kdriêk Dak Mil, čar Dak Nông truh ară anei mâo leh 20 thŭn. Ñu hdĭp lu jing jưh knang hlăm bruă rông kan tinei. Ƀiădah mơ̆ng thŭn 2018 truh kơ ară anei, anôk bruă knơ̆ng kdơ̆ng êa Dak Nông hưn amâo lŏ kuôl kă brei mưn yua krĭng ênao êa anei kyua kpăk gun dŭm klei kčah mtrŭn hlăm Hdră bhiăn knơ̆ng kdơ̆ng êa, bruă duh bi liê mơ̆ng Nhi kpăk đuôm. Bruă kriê dlăng, ba yua ênao êa ăt bluh mâo lu klei bi kuan, lu mnuih nao trah mă kan ƀiădah ñu kăn dưi kăm ghă. Klei anei mâo leh 4 thŭn hŏng anei, Nhi akâo kơ bruă sang čư̆ êa hnưm mâo hdră msir mghaih klei anei čiăng kơ ñu h’ĭt ai tiê duh bi liê kơ bruă:

“Ba mdah mơ̆ng sui leh ƀiădah gun kpăk kơ Hdră bhiăn. Siñê bi mklă kơh kâo jhŏng duh bi liê kyua ară anei kâo kăp kriê dlăng ênao êa, knơ̆ng kdơ̆ng êa đuič amâo jhŏng duh bi liê ôh. Amâo bi mklă ênưih snăk mâo klei bi kuan, klă klơ̆ng hluê ngă djŏ hdră bhiăn, mâo klei bi mklă kơh kâo jhŏng duh bi liê”.

Lu knŏng kdơ̆ng êa ti Lăn Dap Kngư kƀah anôk brei mưn êa

        Bùi Phong Danh, K’iăng khua anôk bruă ti kdriêk DakMil – Anôk bruă TNHH MTV ba yua ênao êa, knơ̆ng kdơ̆ng êa čar Dak Nông, brei thâo: Kluôm kdriêk mâo 43 hdră bruă hŏng hlăm brô 22 êklăk m3, ênhă ƀô̆ êa êbeh 300 ha. Jih jang ênao êa, knơ̆ng kdơ̆ng êa anei amâo dưi kuôl kă brei mnuih ƀuôn sang mañ ôh kyua gun kpăk Hdră bhiăn Knơ̆ng kdơ̆ng êa thŭn 2017 lehanăn Hdră mtrŭn mrô 67 thŭn 2018. Hluê si Danh, gun kpăk tinei jing klei kčah mtrŭn dưi ba yua lăn hlăm hră m’ar ba mdah kơ anôk bruă djŏ tuôm ksiêm dlăng bi mklă hdră duh mkra mnia mblei. Hlăk jih jang ênao êa, knơ̆ng kdơ̆ng êa ară anei ka dưi mkăp hră djă yua lăn kơ anôk bruă kriê dlăng:

“Thŭn 2017 čar kčah mtrŭn sa ênoh prăk kčah mtrŭn brei mưn yua ênao êa, knơ̆ng kdơ̆ng êa jing 250prăk/m2/thŭn. Alŭ wăl ăt mâo lu mnuih čiăng mưn yua, ƀiădah gun kpăk kơ Hdră bhiăn kdơ̆ng knơ̆ng êa, Hdră mtrŭn 67, mgô̆ bruă rông mnơ̆ng hlăm êa brei mâo hră dưi brei rông. Čiăng dưi mkăp hră anei snăn brei mâo hră m’ar lăn, ƀiădah hră m’ar lăn čar ka ba jao ôh kơ anôk bruă kyua anăn anôk bruă amâo dưi ngă ôh klei anei.

        Lê Viết Thuận, Khua anôk bruă TNHH MTV ba yua knơ̆ng kdơ̆ng êa čar Dak Nông brei thâo: Jih 250 knơ̆ng kdơ̆ng êa ti alŭ wăl čar ka dưi mkăp hră dưi djă yua lăn. Klei lui ti mang dŭm ênao êa anei ti alŭ wăl jing prŏng snăk ƀiădah amâo thâo bĭt mjing, kyua brei mañ jing ngă soh hŏng klei kčah mtrŭn. Dŭm klei gun kpăk, klei lui ti mang anei srăng dôk mâo sui kyua hdră mkăp klei dưi djă yua lăn kơ dŭm hdră knơ̆ng kdơ̆ng êa, ênao êa jing sa kdrêč dleh, sa kdrêč jing kƀah prăk bi liê. Dăl mơ̆ng thŭn 2018 truh kơ ară anei, anôk bruă mrâo duh prăk čiăng mkă lăn, pơ̆ng kdriêl kơ hlăm brô 10 mta bruă mprăp mkăp hră dưi djă yua lăn, hŏng hnơ̆ng ka truh 5%.

 “Čiăng dưi ngă sa hdră bruă mâo dŭm gưl jao lăn, pơ̆ng gơ̆ng snăn brei čih mkra hdră ngă bruă, lehanăn akâo hdră mtrŭn, akâo prăk duh bi liê amâo djŏ leh jao hlŏng mkăp hră dưi yua lăn ôh. Hlăk êjai hră m’ar êlâo adih kơ bruă msir mghaih anôk ala amâo lu msĕ ară anei. Êlâo adih mâo klei bi kƀĭn ƀuôn sang snăn lu jing arăng myơr lăn, mâo lu gŏ êsei ka dưi mkra mlih ênhă lăn. Klei anei amâo mplĕ klei soh kơ hlei pô ôh kyua mơ̆ng êlâo adih truh kơ ară anei gơ̆ snăn leh.

Lăn Dap Kngư mâo ebeh 2000 hdră bruă knơ̆ng kdơ̆ng êa luič mang kyua amâo dưi mưn

        Nguyễn Công Hạnh, K’iăng khua anôk bruă TNHH MTV ba yua hdră bruă knơ̆ng kdơ̆ng êa čar Dak Lak brei thâo: Anôk bruă sang čư̆ êa čar tŭ ư hŏng hdră êlan čiăng kơ anôk bruă kuôl kă êjai hdră brei mưn yua lăn hlăk ka mâo hră bi mklă dưi djă yua lăn. Ƀiădah hluê si Hdră mtrŭn mrô 96 thŭn 2018 kčah mtrŭn klă klơ̆ng kơ ênoh ênil, hdră bruă knơ̆ng kdơ̆ng êa lehanăn đru prăk kăk ba yua hdră anei snăn brei hưn mthâo hŏng dŭm phŭn, dhar bruă djŏ tuôm bi mklă. Anôk bruă sang čư̆ êa čar Dak Lak ba mdah 2 thŭn hŏng anei ƀiădah ka dưi bi mklă. Dŭm klei kuôl kă brei mưn yua lăn ti 246 ênao êa hŏng hlăm brô 2.000ha anôk bruă kriê dlăng ăt kăn dưi hluê ngă, luič liê lu ngăn prăk lehanăn hŏng bruă rông mnơ̆ng hlăm êa năng ai srăng truh dŭm êtuh êklai prăk hlăm grăp thŭn:

“Anôk bruă čih mkra leh ênoh ênil ba m’ĭt kơ Anôk bruă sang čư̆ êa čar lehanăn Anôk bruă sang čư̆ êa čar mâo leh hră ba m’ĭt kơ Phŭn bruă Lŏ hma mđĭ kyar krĭng ƀuôn sang, Phŭn bruă Ngăn prăk ƀiădah truh kơ ară anei ăt ka dưi bi mklă. Anei jing klei dleh dlan prŏng êdi čiăng hluê ngă, kyua amâo klei kčah mtrŭn kơ ênoh snăn amâo dưi kuôl kă ôh. Snăn luič liê prŏng êdi hlăm hdră duh mkra. Tal dua, tơdah amâo mâo mkăp hră djă yua lăn srăng bluh mâo klei mnuih ƀuôn sang bi kuan, ngă luič klei êđăp ênang

        Čiăng ruh mtlaih klei dleh dlan kơ alŭ wăl, mjing klei găl ba yua, mđĭ lar tŭ dưn ênhă ênao êa, knơ̆ng kdơ̆ng êa kơ bruă rông mnơ̆ng hlăm êa lehanăn dŭm hdră bruă mkăn, dôk čiăng êdi klei hgŭm kngan mơ̆ng dŭm phŭn, dhar bruă gưl dlông./.

                                                    Pô mblang: H’Nêč Êñuôl