Kpuih H’Joi, 40 thŭn ti ƀuôn Sung Kép, să Ia Kla, kdriêk Đức Cơ, čar Gia Lai jing gŏ êsei dưi dưn mơ̆ng hdră brei čan đru ba ala ƀuôn. Êlâo dih, gŏ sang H’Joi jing gŏ êsei ƀun, klei hdĭp bô̆ hŏng dleh dlan. Kyua dưi čan 80 êklăk prăk mơ̆ng prăk brei čan đru ba ala ƀuôn, gŏ sang H’Joi mkra mđĭ pưk sang leh anăn mâo prăk bi liê pla 3 ha kñŭl ti lăn hma gŏ sang pô. Mâo sang kjăp, mâo đang pla mjing čiăng kriê dlăng đru leh H Joi ktưn hưn hĭn čiăng mđĭ kyar bruă duh mkra gŏ sang.

 “Hlăk êlâo adiê hjan snăn hlăm sang nao mă hmăm leh anăn ksô mgơ̆ng êa. Ară anei mâo knŭk kna brei čan dưi mdơ̆ng sang mrâo snei snăn ăt mni lač jăk. Mâo sang ăt hơĭt ai tiê sa kdrêč čiăng mă bruă kơ klei hdĭp jăk hĭn.”

Să Ia Kla, kdriêk Đức Cơ jing să krĭng II, hŏng ênoh gŏ êsei ƀun leh anăn giăm ƀun, lu jing mnuih djuê ƀiă. Ară anei ti să mâo 1056 gŏ êsei dưi čan prăk hŏng ênoh êbeh 63 êklai prăk mơ̆ng Knơ̆ng prăk đru ba ala ƀuôn kdriêk. Hoàng Đức Anh, Khua Knơ̆ng bruă sang čư̆ êa să Ia Kla brei thâo:

 “Mơ̆ng dŭm phŭn prăk brei čan mđĭ lar klei hdĭp mnuih ƀuôn sang, grăp knhuang dưi mđĭ leh anăn hơĭt kjăp. Să srăng lŏ dơ̆ng bi hgŭm hŏng knơ̆ng prăk đru ba ala ƀuôn kdriêk čiăng pŏk ngă dŭm ênoh prăk brei čan hlue hdră bi lar truh kơ mnuih ƀuôn sang, truh kơ phung dưi dưn čiăng si bĕ ngă mâo hdră kñăm knhal tuč jing mđĭ klei hdĭp mnuih ƀuôn sang.”

Gŏ sang amai Siu Nhã (31 thŭn) leh anăn ayŏng Đoàn Công Toàn (35 thŭn) ti alŭ 6, wăl krah Čư̆ Prông, kdriêk Čư̆ Prông ăt dưi hŏng klei dleh dlan kyua ênoh prăk anei. Thŭn 2022, gŏ sang amai Siu Nhã yua leh 80 êklăk prăk mơ̆ng prăl brei čan đru ba ala ƀuôn čiăng bi liê mđĭ kyar mkra mjing. Amai Nhã brei thâo, klei čang hmăng prŏng hĭn mơ̆ng dua ung mô̆ jing tlaih ƀun hlăk ƀrư̆ jing sĭt.

 “Êlâo dih snăn klei găl gŏ sang ka hơĭt msĕ si ară anei. Mơ̆ng leh dua ung mô̆ čan prăk đru ba ala ƀuôn snăn hŏng ênoh prăk anăn hmei bi liê pla 1 ha kphê hŏng 400 gơ̆ng tiu, bruă duh mkra gŏ sang ƀrư̆ hơĭt kjăp. Pô gĭr dŭm thŭn kơ anăp snăn tlaih giăm ƀun leh anăn mâo klei hdĭp djăp ênŭm hĭn.”

Từ Ngọc Thông, K’iăng Khua Knơ̆ng bruă sang čư̆ êa kdriêk Čư̆ Prông, brei thâo, ênoh prăk čan đru ba ala ƀuôn pŏk ngă ti alŭ wăl kdriêk đru leh kơ ênoh gŏ êsei ƀun grăp thŭn 3%.

 “Prăk brei čan đru ba ala ƀuôn jing sa hlăm dŭm hdră msir čiăng hlue ngă bruă bi hrŏ ƀun kjăp. Hŏng Asăp mtrŭn 40 thŭn 2014 anei jing knhuang êdah êdi kơ klei yua prăk knŭk kna čiăng đru, mjing klei găl mâo thiăm prăk brei čan čiăng hlue ngă hdră êlan brei čan đru ba ala ƀuôn. Truh ară anei hmei mđĭ leh hnơ̆ng dưi čan čiăng ngă hdră msir bi hrŏ ƀun kjăp ti alŭ wăl.”

Truh ară anei, brei čan đru ba ala ƀuôn pŏk ngă leh truh jih jang dŭm să krĭng taih kbưi kluôm čar Gia Lai. Ênoh brei čan prăk mnga hdjul mâo giăm 16.500 êklai prăk, hŏng êbeh 500 êbâo gưl gŏ êsei ƀun, gŏ êsei giăm ƀun leh anăn phung knŭk kna dlăng ba dưi čan, hlăm anăn mnuih djuê ƀiă mâo giăm mkrah wah. Mơ̆ng anăn, ênoh gŏ êsei ƀun ti Gia Lai hrŏ leh mơ̆ng êbeh 23% thŭn 2014 adôk êbeh 8% msĕ si ară anei. Rah Lan Chung, K’iăng Khua dlăng bruă Đảng čar Gia Lai, brei thâo:

 “Hlăm wưng kơ anăp, hlăm boh klei mrâo, hlăm klei găl mrâo, dŭm mta phŭn leh anăn boh sĭt adôk mâo lu klei ka dưi djŏ guôp. Kyua anăn, bruă Đảng čar mâo klei akâo hŏng Gưl dlông brei mkŏ mjing Hdră mtrŭn mơ̆ng Phŭn bruă kđi čar kơ klei mđĭ bruă Đảng gĭt gai hŏng klei brei čan prăk đru ba ala ƀuôn hlăm kluôm ala, hlăm anăn mâo Gia lai čiăng si bĕ ngă yua tŭ dưn prăk brei čan, đru klă sĭt hlăm klei mkŏ mjing leh anăn mđĭ kyar lăn čar ăt msĕ mơh čar Gia Lai.”

 Kyua prăk čan mơ̆ng dŭm hdră brei čan, Gia Lai mâo leh dŭm klei đĭ kyar hlăm bruă hlue ngă Hdră kñăm ala čar kơ klei bi hrŏ ƀun kjăp, mkŏ mkra krĭng ƀuôn sang mrâo, mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng./.