VOV4.Êđê- Dŭm êtuh phŭn ana hngô hlăm ƀuôn hgŭm mrô 8, ƀuôn prŏng Đà Lạt, čar Lâm Đồng arăng uă druôm. Klei čiăng lač kơ anei, bruă bi rai dliê anei amâo mâo djŏ čiăng mă kyâo ôh, ƀiădah ya mta klei diñu kñăm snăn anôk bruă djŏ tuôm dôk ksiêm bi mngač. Dliê anôk bi rai jing ti čuê dliê A; B hlăm wăl dliê mrô 15, đang dliê 148D, ƀuôn hgŭm mrô 8, ƀuôn prŏng Đà Lạt, dliê anei mâo Anôk bruă kiă kriê kyâo hlăm ƀuôn prŏng kiă kriê.

Tinei dŭm êtuh phŭn hngô mâo boh prŏng mơ̆ng 20 – 60cm leh druôm êbuh mtŭk mtŭl. Hlăm ênoh anăn mâo đa đa ana hla gơ̆ kñĭ krô leh, lehanăn mâo mơh ana mrâo druôm hla adôk mtah, asei ana dôk rôč ktăk. Klei bi rai dliê anei ka thâo klă ôh hbĭl klei anăn truh, ƀiădah hlăm aguah hrue 17/5, anôk bruă djŏ tuôm ƀuôn prŏng Đà Lạt pral nao ksiêm dlăng bi yap dŭm ƀĕ kyâo êbuh čiăng bi leh hră mơar pioh tui duah pô ngă soh./.

         Pô mblang: Y-Khem Niê