Wưng thŭn 2018-2024, ti Lăn dap kngư mâo lu gru hmô jih jang mnuih ƀuôn sang răng mgang klei êđăp ênang ala čar, jing gru mngač hluê hdră čŏng pô kriê dlăng, răng mgang, mâo êpul êya mnuih djuê ƀiă sa ai, nao hgŭm. Êdah êdi jing dŭm gru hmô “Đăo djŏ, kriê kjăp klei h’ĭt ênang ƀuôn sang”, “Hdră kriê dlăng bruă mtô bi hriăm hŏng phung hluê FULRO hlăm êpul êya” ti čar Gia Lai; gru hmô “Sang bi kƀĭn êđăp ênang – rơ̆ng klei êđăp ênang yang ƀuôn”, “Êpul čŏng kriê dlăng klei êđăp ênang lehanăn mjuăt bi hriăm phung êdam êra ngă soh hŏng hdră bhiăn” ti čar Kon Tum; gru hmô “Krĭng mnuih ƀuôn sang dôk êđăp ênang amâo mâo phung ngă soh”, 3 klei êđăp ênang kñăm rơ̆ng klei h’ĭt ênang ti Sang bi kƀĭn klei đăo klei mrâo mrang jăk Êa Sol” ti čar Dak Lak; gru hmô “5+1 kriê dlăng, mjuăt bi hriăm, đru kơ mnuih mrâo wĭt mnă lŏ ñŭ kma hŏng ala ƀuôn, “Sang bi kƀĭn Khop Nhân Cơ rơ̆ng klei êđăp ênang bruă kđi čar” ti čar Dak Nông; gru hmô “Êpul anôk mnuih ƀuôn sang dôk rơ̆ng klei êđăp ênang ala ƀuôn”, “Mnuih hluê đăo krĭng mnuih ƀuôn sang djuê ƀiă alŭ 4, să Tân Châu siă suôr hŏng hdră rơ̆ng klei êđăp ênang ala ƀuôn” ti čar Lâm Đồng…

Mơ̆ng hdră anei mâo leh lu gru mngač êdah êdi, ba akŏ hluê ngă jăk hdră mtrŭn mơ̆ng Đảng, hdră bhiăn mơ̆ng Knŭk kna, klei kčah mtrŭn mơ̆ng alŭ wăl. Lu mnuih nao hgŭm, đru kơ dŭm êpul hlăm bruă rơ̆ng kjăp klei êđăp ênang ala ƀuôn, mtô mblang, mtrŭt mjhar mnuih ƀuôn sang răng ti anăp mnêč jhat, klei bi kah ana mbha djuê, bi rai klei thâo bi mguôp djuê ana; bi kdơ̆ng hŏng phung ngă soh, klei truh jŭ jhat hlăm ala ƀuôn, gang mkhư̆ klei pui ƀơ̆ng, răng mgang knông lăn, gơ̆ng knăl knông lăn, răng mgang wăl hdĭp mda.

Ti Anôk bi kƀĭn, Phŭn bruă kahan ksiêm jao leh Hră pah mni kơ 86 êpul êya, mnuih kdlưn hĭn bi ala kơ dŭm gru hmô êdah êdi hlăm hdră jih jang mnuih ƀuôn sang răng mgang klei êđăp ênang Ala čar krĭng mnuih djuê ƀiă ti Lăn dap kngư wưng thŭn 2018 – 2024. Y-Djan Êban, ti să Êa Ktur, kdriêk Čư̆ Kuiñ, čar Dak Lak jing sa hlăm dŭm čô mnuih mâo bi mni gưl anei, brei thâo:

 “Kâo m’ak êdi mâo Phŭn bruă kahan ksiêm jak nao bi mjĕ mjuk hlăm hdră jih jang mnuih ƀuôn sang răng mgang klei êđăp ênang ala čar, kâo m’ak êdi. Leh klei bi kƀĭn anei, kâo srăng lŏ wĭt hŏng alŭ wăl nao hgŭm hŏng mnuih ƀuôn sang mđĭ kyar bruă duh mkra, ala ƀuôn, răng mgang klei êđăp ênang, gĭr mă bruă jăk hĭn hŏng ƀuôn sang”.

Mbĭt hŏng klei bi kƀĭn kluôm mơ̆ng krĭng, ti čar Dak Lak, Phŭn bruă kahan ksiêm mkŏ mjing leh Hruê m’ak jih jang mnuih ƀuôn sang răng mgang klei êđăp ênang ala čar hlăm krĭng mnuih djuê ƀiă thŭn 2024. Hluê si klei hưn, hdră jih jang mnuih ƀuôn sang răng mgang klei êđăp ênang ala čar mâo leh knhuah đĭ kyar kjăp, êlam mơ̆ng čar truh kơ nah gŭ. Lu gru hmô čŏng răng mgang klei êđăp ênang, dŭm êpul hgŭm bi kdơ̆ng hŏng phung ngă soh mđĭ lar leh boh tŭ dưn. Blŭ hlăm knăm anei, Trung tướng Lê Quốc Hùng, K’iăng khua phŭn bruă kahan ksiêm mñă: Dak Lak jing krĭng phŭn ti Lăn dap kngư mâo anôk phŭn, yuôm bhăn hlăm bruă răng mgang klei êđăp ênang, hdră kđi čar, dhar kreh, ala ƀuôn. Kyua anăn, hdră rơ̆ng kjăp klei êđăp ênang ala ƀuôn, mjing wăl anôk êđăp ênang, mkăp kơ hdră mđĭ kyar bruă duh mkra – ala ƀuôn jing bruă yuôm bhăn wăt hlăm anôk bruă kđi čar. Trung tướng Lê Quốc Hùng mtă, Dak Lak lŏ dơ̆ng mtrŭt mđĭ hdră jih jang mnuih ƀuôn sang răng mgang klei êđăp ênang ala čar, krŭ wĭt, mđĭ lar klei đua klam, ai ktang hlăm mnuih ƀuôn sang.

 “Brei mđing bi kjăp, mkŏ mkra anôk bruă kđi čar nah gŭ kjăp ktang kluôm dhuôm. Grăp čô knuă druh, đảng viên brei nao êlâo, thâo klă klei čang hmăng mơ̆ng mnuih ƀuôn sang, kyua klei tŭ kơ mnuih ƀuôn sang, ba akŏ hlăm hdră jih jang mnuih ƀuôn sang răng mgang klei êđăp ênang Ala čar. Mtrŭt mđĭ hdră đru čung ba mnuih ƀuôn sang mguôp hŏng bruă mtô mblang, mtrŭt mjhar, mđĭ klei thâo săng mơ̆ng mnuih ƀuôn sang. Mđing kơ dŭm alŭ wăl phŭn, krĭng mnuih djuê ƀiă, mlih mrâo hdră mtô mblang čiăng mkŏ mkra hdră jih jang mnuih ƀuôn sang răng mgang klei êđăp ênang ala čar”.

Hlăm knăm anei, Phŭn bruă kahan ksiêm lehanăn Anôk bruă sang čư̆ êa čar Dak Lak mđup brei leh lu hnư mnơ̆ng kơ gŏ sang mnuih djuê ƀiă mâo klei hdĭp dleh dlan ti alŭ wăl ƀuôn prŏng Ƀuôn Ama Thuôt. Ƀri gưl anei, sa êpul êya, sa čô mnuih mâo mă Hră pah mni mơ̆ng Phŭn bruă kahan ksiêm, sa êpul êya, 3 čô mâo mă hră pah mni mơ̆ng Khua Anôk bruă kahan ksiêm čar Dak Lak kyua mâo boh tŭ dưn hlăm hdră jih jang mnuih ƀuôn sang răng mgang klei êđăp ênang Ala čar thŭn 2024./.