Leh êbeh 20 thŭn atăt ba gŏ sang hriê ti Dak Lak mkŏ mkra klei hdĭp mrâo, truh kơ ară anei, hlăk ai ba anăp êlâo dih Vũ Văn Khanh ti alŭ 7, să Êa Nam, kdriêk Êa Hleo, čar Dak Lak dưi mkŏ mjing leh sa anôk pla mjing, rông mnơ̆ng lu mta. Hŏng 12ha lăn, ñu pla pluă lu mta ana msĕ si ksu, tiêu, kñŭl, boh kneh, durian mguôp hŏng bruă rông mnơ̆ng, klei ênao êa rông kan lehanăn mkăp pioh êa krih kơ mnơ̆ng pla. Mơ̆ng đang war anei, grăp thŭn, gŏ sang ñu hrui mâo êbeh 1 êklai prăk; mjing bruă mă kơ 10 čô ngă bruă alŭ wăl. Vũ Văn Khanh brei thâo:

 “Mđĭ lar knhuah gru jăk siam mơ̆ng êpul êdam êra ba anăp leh wưng ngă bruă dleh dlan snăn ară anei hdră duh mkra đĭ kyar hơĭt kjăp leh. Leh hơĭt snăn pô thâo đru kơ mnuih dleh dlan hĭn, si tô hmô đru êa kroh kơ ayŏng adei mnuih djuê ƀiă djiêu gah krĭng wăl, thŭn anei ăt truh dŭm pluh ha mơh. Alŭ amâo mâo sang bi kƀĭn prŏng snăn pô đru hlăm brô 1.000m2 lăn čiăng ngă sang bi kƀĭn čiăng mâo anôk kơ mnuih ƀuôn sang bi mjĕ mjuk”.

 Jing pô ba anăp nao hgŭm răng mgang knông lăn nah Dưr, leh hruê ala čar hluh lir, Nguyễn Đình Chiến đuê̆ mơ̆ng ƀuôn sang pô Quảng Ninh hriê mkŏ mkra klei hdĭp mrâo ti ƀuôn hgŭm An Lạc, wăl krah Ƀuôn Hô. Leh lu thŭn mlan kreh kriăng mă bruă knuă, mđĭ kyar bruă duh mkra. Truh kơ ară anei, ñu dưi mkŏ mkra sa sang maĭ mkra mjing kphê kpŭng, pŏk anôk čhĭ kdrăp mnơ̆ng yua hlăm bruă lŏ hma, bruă hiu čhưn ênguê, hrui wĭt êbeh 1,5 êklai prăk grăp thŭn. Ngă bruă duh mkra êjai, Chiến lŏ nao hgŭm hlăm dŭm hdră bruă ti alŭ wăl, đru kơ mnuih dleh dlan čan prăk duh kơ bruă, đru kơ kdrăp mnơ̆ng lŏ hma amâo tĭng prăk mnga. Pô ba anăp Nguyễn Đình Chiến yăl dliê:

 “Tui hriăm asăp Awa brei thâo khăp kơ ayŏng adei mkăn, thâo hgŭm mguôp, bi đru hlăm hdră msir klei ư̆ êpa bi hrŏ klei ƀun knap. Ƀuh klă klei dleh dlan snăn mkra mđĭ, mjing bruă mă kơ jih jang čô anak hlăm êpul hgŭm. Mđĭ ai mnuih hgŭm hlăm êpul nao hlăm hdră anei jing djŏ, tui hriăm djŏ hdră bhiăn, mkŏ mkra krĭng ƀuôn sang mrâo lehanăn jing krĭng ƀuôn sang dôk ti alŭ wăl anôk pô dôk”.

 Hluê ngă hdră “Phung êdam êra ba anăp hđăp ngă bruă duh mkra mbruă - Kyua klei khăp ƀĭng kahan”, ti Dak Lak mâo leh lu gru hmô bruă duh mkra êdah êdi hlăm bruă mkra mjing mnơ̆ng lŏ hma, pla mnơ̆ng mguôp hŏng bruă rông mnơ̆ng, mnia mblei… Hlăm 5 thŭn êgao, mâo leh giăm 50 gŏ sang lehanăn Êpul hgŭm bruă lŏ hma mbruă bruă duh mkra mâo êpul êdam êra ba anăp hđăp kiă kriê mâo tŭ yap, mjing bruă mă kơ giăm 200 čô êdam êra ba anăp hđăp lehanăn găp djuê.

Hluê Trần Thị Xuân, Khua Êpul êdam êra ba anăp hđăp čar Dak Lak, mbĭt hŏng bruă bi đru ngă hdră duh mkra, mnuih hgŭm hlăm êpul lŏ đru mguôp hlăm leh khăp čiăng ƀĭng găp, đru kơ hdră ngă bruă mơ̆ng Êpul, đru kơ mnuih dleh dlan, ruă duam.

 “Hdră “Phung hlăk ai ba anăp hđăp mbruă bruă duh mkra, kyua klei khăp ƀĭng kahan” lehanăn hdră bruă “Kyua klei khăp ƀĭng kahan, grăp čô mnuih hgŭm ngă lu bruă jăk”, anei jing 2 hdră bruă êdah êdi mâo Êpul kahan hđăp brei ngă nanao, mtrŭt mjhar bi lông mơ̆ng Êpul hgŭm gưl čar truh kơ mnuih hgŭm ti gưl nah gŭ. Hlăm hdră Phung êdam êra ba anăp hđăp mbruă bruă duh mkra, kyua klei khăp ƀĭng găp” snăn ară anei wĭt hŏng klei hdĭp aguah tlam, phung êdam êra ba anăp hđăp adôk suaih pral snăn lŏ gĭr ngă bruă duh mkra pla mjing čiăng đru mguôp hlăm hdră mđĭ kyar bruă duh mkra, dhar kreh ala ƀuôn mơ̆ng alŭ wăl”.

Hdơr nanao Asăp mtă mơ̆ng Awa Hô “Amâo mâo bruă dleh, knŏng huĭ ai tiê drei amâo kjăp, klei čư̆ dơr êa ksĭ, tơdah drei gĭr ăt dưi mơh”, leh ngă bruă klam hŏng Ala čar, lŏ wĭt hŏng klei hdĭp aguah tlam, phung êdam êra ba anăp hđăp ti Dak Lak lŏ mđĭ lar ai tiê “Phung êdam êra ba anăp, phung mduôn khua jing gru hmô”. Diñu ăt jih ai tiê pô nao hgŭm hlăm hdră mđĭ kyar bruă duh mkra lehanăn đru mguôp hlăm hdră mđĭ kyar bruă duh mkra, ala ƀuôn ti alŭ wăl”./.