Ti Anôk bruă mguôp hnư Msei hjei Asean hlăm Wăl tuh tia mkra mjing Hòa Phú, dŭm mta maĭ mŏk ngă bruă jih hnơ̆ng. Hluê si Lê Thị Tuyết Hạ, K’iăng khua anôk bruă, hlăm brô 600 čô mnuih dôk mă bruă hlăm dŭm hruê akŏ thŭn. Anôk bruă mâo leh klei kuôl kă blei mnơ̆ng mơ̆ng dŭm anôk, čang hmăng klei jăk siam srăng truh hlăm thŭn 2024.

 “Leh jih wưng mdei, dŭm hruê akŏ yan mnga ai êwa ngă bruă jăk, mnuih nao mă bruă ênŭm, akŏ thŭn Anôk kriê dlăng ăt h’êč hmưi akŏ thŭn, mđĭ ai kơ jih jang ayŏng amai adei, mnuih mă bruă. Anôk kriê dlăng čang hmăng wăl anôk blei mnia jăk găl, mâo lu hdră rŭ mdơ̆ng čiăng kơ anôk bruă dưi mkra, ba čhĭ lu mnơ̆ng mơ̆ng anăn mnuih mă bruă mâo lu mơh bruă mă, hnư hrui wĭt lu mơh”.

Ăt hlăm dŭm hruê akŏ yan mnga Giáp Thìn, Anôk bruă tă kčoh Lực Thiêm ti Wăl tuh tia mkra mjing Tân An 2 mâo leh lu klei kuôl kă blei mnơ̆ng mrâo. Trần Trí Vỹ, Khua anôk bruă brei thâo, 1 êbâo čô mnuih lŏ wĭt mă bruă, hlăm anăn mâo 95% jing mnuih djuê ƀiă lehanăn 90% jing phung mniê. Ară anei, anôk bruă dôk mjêč hrŏng ruah mnuih mă bruă mrâo lehanăn pŏk mlar anôk ngă bruă čiăng mkăp mnơ̆ng dhơ̆ng ba čhĭ.

 “Anôk bruă duh mkra hruê 10 pŏk ngă bruă leh, hruê tal êlâo nao mă bruă mâo 98% ênoh mnuih. Thŭn anei, klei kuôl kă blei mnơ̆ng đĭ hĭn thŭn êlâo hlăm brô 20%, klei anei mjing boh kdrŭt kơ anôk bruă duh mkra dưi đĭ kyar hĭn. Ară anei, anôk bruă dôk hrŏng ruah mnuih mă bruă ti alŭ wăl, ară anei mâo leh 1 êbâo čô mnuih mă bruă. Hlăm 3 mlan gưl 1 anei, anôk bruă lŏ čiăng 300 čô mă bruă mơh”.

Klei bi êdah jăk mơ̆ng dŭm anôk bruă duh mkra đru lẻh kơ mnuih mă bruă gĭr ktưn hĭn hlăm dŭm hruê akŏ thŭn mrâo. H’Theo Triết ti ƀuôn Jun, să Yang Tao, kdriêk Lăk, ară anei dôk mă bruă ti Anôk bruă tă kčoh Lực Thiêm brei thâo, ñu srăng gĭr mă bruă pô čiăng mkra mđĭ hnư hrui wĭt.

 “Mơ̆ng leh kâo mŭt mă bruă tinei, klei hdĭp kâo dưi mkra mđĭ lehanăn dŭm hdră đru mơ̆ng Anôk bruă ăt jăk mơh. Leh ruê̆ Têt kâo ƀuh grăp čô mnuih hơ̆k kdơ̆k gĭr mă bruă s’aĭ”

Hluê si Nguyễn Kim Tùng, Khua anôk bruă kriê dlăng wăl tuh tia mkra mjing Tân An, ară anei, wăl tuh tia mkra mjing mâo 73 anôk bruă duh mkra dôk mă bruă, mâo 100%. Dŭm hruê akŏ thŭn mrâo 2024 ai êwa ngă bruă ti dŭm anôk bruă mčhĭt m’uăt leh hŏng klei gĭr mđĭ hnơ̆ng tŭ jăk hdră mă bruă, mđĭ hnơ̆ng mâo mnơ̆ng dhơ̆ng.

 “Truh ară anei 100% anôk bruă duh mkra mŭt ngă bruă leh mbĭt anăn hnơ̆ng mnuih mă bruă êlâo, êdei kơ Têt ăt msĕ aguah tlam lehanăn hdră kčah hlăm 3 mlan gưl 1, gưl 2 srăng đĭ truh 2 êbâo čô. Akŏ thŭn ƀuh dŭm wăl tuh tia mkra mjing, mnuih mă bruă hơ̆k kdơ̆k gĭr mă bruă s’aĭ. Kâo ăt čang hmăng hlăm thŭn 2024 bruă duh mkra amâo lŏ dleh dlan ôh lehanăn grăp čô gĭr mă bruă knuă, čiăng ba wĭt prăk mnga lehanăn mkra mđĭ klei hdĭp kơ mnuih ƀuôn sang”.

Yan mnga 2024 hŏng klei bi êdah mơak hŏng dŭm anôk bruă duh mkra, mnuih mă bruă ti Dak Lak ba leh klei hơ̆k m’ak, klei čang hmăng kơ dŭm boh tŭ dưn mrâo hlăm hdră mđĭ kyar bruă duh mkra ala ƀuôn, mkra mđĭ klei hdĭp mnuih ƀuôn sang./.