VOV4.Êđê- Aguah mbruê 29/6, anôk bruă tĭng mkă (phŭn bruă hdră êlan leh anăn duh bi liê) mkŏ mjing leh klei kƀĭn ba mdah klei čih tĭng mkă bruă duh mkra – ala ƀuôn wưng tlâo mlan tal 2 thŭn 2022. Hluê si klei hưn mdah, 6 mlan akŏ thŭn, GDP đĭ 6.42% - lu hĭn klei đĭ kyar wưng thŭn 2020 - 2021 ƀiădah ka wĭt ôh hlăm hnơ̆ng ti thŭn 2019, kluôm ala mâo 76 êbâo 600 knơ̆ng bi klă mkŏ mjing mrâo, đĭ 13,6%, 602 êbâo gưl čô tuê hiu čhưn ênguê ti ala čar Việt Nam, đĭ êbeh 6,8 blư̆ mkă hŏng wưng anei thŭn dih. Ênoh prăk duh bi liê klă anăp mơ̆ng ala tač êngao (FDI) ăt đĭ ti hnơ̆ng lu hĭn wưng anei hlăm 5 thŭn êgao… Anei jing dŭm klei bi knăl jăk mơ̆ng klei krŭ wĭt bruă duh mkra hlăm 6 mlan akŏ thŭn. Anôk bruă tĭng mkă mñă klă, bruă duh mkra Việt Nam mâo klei găl đĭ kyar ktang hĭn hlăm dŭm mlan adôk, klei čiăng ba yua mnơ̆ng dhơ̆ng leh anăn bruă mkăn srăng mtrŭt mđĭ ênoh mnơ̆ng dhơ̆ng đĭ yuôm.

Pô mblang: Y-Ƀel Êban