Knŏng ñu yơh jing pô bi ala mơ̆ng čar Dak Lak dưi pah mni hlăm Knăm pah mni phung hđeh sang hră, phung hriăm gưl prŏng, phung êdam êra mnuih djuê ƀiă êdah êdi gưl tal 10, thŭn 2023, adei Đoàn Gia Hân, mnuih djuê ana Tày, hđeh sang hră adŭ 12, sang hră gưl tlâo chuyên Nguyễn Du mâo hră puăng êdah êdi. Adei mâo lu boh tŭ dưn msĕ si: Klei pah mni mrô 1 gưl čar leh anăn mrô 2 gưl ala čar Klei bi lông Olympic klei Angle phung hđeh sang hră – phung hriăm gưl prŏng thŭn 2022, jing “Hđeh sang hră tlâo jăk” gưl dlông, sa čô hgŭm hlăm Êpul hđeh sang hră hriăm thâo mta hriăm Sinh Học. Amâodjŏ knŏng hriăm hră thâo, Gia Hân lŏ nao hgŭm hlăm lu bruă mkăn, hdră bruă yang ƀuôn, ăt msĕ mơh hŏng bruă Đoàn, bruă Êpul. Ñu jing khua hlăm êpul bruă đoàn ti sang hră, sa čô hgŭm hlăm êpul bi mguôp hriăm klei Angle gưl čar. Đoàn Gia Hân brei thâo: ñu mâo nanao klei gĭr dăp mmông djŏ guôp čiăng dưi nao hgŭm hlăm dŭm hdră bruă. Mbĭt anăn amâo mâo mdei klei gĭr hluê hriăm čiăng mđĭ hĭn klei thâo kơ pô.

Kâo čiăng lŏ dơ̆ng gĭr bi lar klei thâo pô ătm sĕ mơh mgaih msir đa đa klei awăt êdu čiăng dưi mâo boh tŭ dưn tă êlan kơ êdei anăp dưi jăk hĭn. Hlăm êdei anăp hŏng mta hriăm thơ̆ng jing sinh học kâo čang hmăng srăng jing sa čô kreh knhâo, ksiêm duah kơ klei mrâo mrang sinh học ăt msĕ hŏng klei mrâo mrang y sinh čiăng ba wĭt dŭm hdră mnêč mrâo mrang hlăm bruă mdrao mgŭn đru kơ grăp čô.

Hŏng Y Un Diễm, ară anei dôk hriăm thŭn tal 3, adŭ bi hriăm phung nai mtô klei Angle, sang hră gưl prŏng krĭng Lăn Dăp Kngư, klei hmăng hmưi nao sang hră mơar đru leh kơ ñu găn jih klei dleh dlan, klei lông dlăng. Lŏ wĭt ti sang hră leh 3 thŭn mâo klei kpăk, sa čô mniê djuê ana Triêng gĭr hluê hriăm leh anăn nao hgŭm hlăm dŭm hdră bruă, jing “Sa čô hriăm gưl prŏng 5 jăk” gưl čar leh anăn jing khua kiă kriê ktrâo atăt êpul hgŭm mâo mă anăn knăl “Êpul phung hriăm gưl prŏng 5 jăk” gưl dlông. Ñu ăt klam ngă lu bruă klam msĕ si jing khua kiă kriê Êpul hgŭm phung hriăm gưl prŏng 5 jăk gưl sang hră, khua hlăm êpul hgŭm phung hriăm gưl prŏng Việt Nam čar Dak Lak. Nao sang hră êjai, nao mă bruă mtô kơ tač êjai, Diễm lŏ mâo lu klei hriăm, hnư hrui wĭt đru kơ klei hdĭp. Mbĭt anăn hlăm ñu ăt mâo sa hdră hjăn pô leh anăn hmăng hmưi srăng ngă ti ƀuôn sang pô hlăm êdei anăp. Y Un Diễm brei thâo:

Kâo mâo sa hdră anăn jing “ba klei Angle wĭt kơ ƀuôn”. Bi hŏng phung mah jiăng jing mnuih djuê ƀiă msĕ hŏng kâo ti alŭ wăl jing dleh dlan êdi dưi hriăm klei Angle. Kyuanăn leh jih hriăm, kâo čiăng wĭt kơ ƀuôn sang kâo, lŏ wĭt đru kơ phung ƀĭng găp anăn čiăng kơ diñu ăt mâo klei găl hriăm klei Angle, dưi nao truh kơ dŭm anôk mrâo leh anăn mbŏ klei khăp kơ diñu, čiăng kơ diñu mâo klei mĭn kjăp, mâo klei găl dưi hriăm msĕ hŏng kâo.

Dak Lak ară anei mâo êbeh 170 êbâo čô hđeh sang hră, phung hriăm gưl prŏng jing mnuih djuê ƀiă dôk hriăm ti dŭm sang hră gưl 3, gưl krah leh anăn gưl prŏng. Hrăm mbĭt hŏng phung hđeh sang hră, phung hriăm gưl prŏng, hlăm wưng êgao, čar Dak Lak mâo leh lu hdră êlan, klei đru, mtrŭt mjhar, mđĭ ai phung hđeh sang hră, phung hriăm gưl prŏng kpưn đĭ, mkŏ mjing klei găl leh anăn boh kdrŭt čiăng kơ diñu mâo klei hơĭt hriăm hră mơar. Adei H Phương Hoa Êban, sa čô hriăm gưl prŏng Nai mtô klei Angle, sang hră gưl prŏng krĭng Lăn Dăp Kngư brei thâo:

Hlăm bruă hriăm hră mơar leh anăn mjuăt pô, kâo mâo nanao klei đru mơ̆ng dŭm hdră êlan mơ̆ng Đảng leh anăn knŭk kna, kâo ƀuh pô dưi mbŏ lu hĭn kơ klei hriăm hră mơar ăt msĕ hŏng klei mjuăt pô. Êngao kơnăn phŭn kčưm mơ̆ng klei hmăng hmưi dưi hriăm čiăng duh myơr jih ai pô kơ yang ƀuôn, hlăm anăn mâo mnuih ƀuôn sang djuê ana pô, kâo čiăng êdi dưi thâo lu hĭn dŭm klei hriăm čiăng duh myơr kơ djuê ana pô.

Mbĭt hŏng dŭm hdră êlan mơ̆ng Đảng leh anăn knŭk kna, hŏng bruă klam bi ala leh anăn răng mgang klei dưn mơ̆ng phung hriăm gưl prŏng, Êpul hgŭm phung hriăm gưl prŏng Việt Nam čar Dak Lak lŏ kñăm hluê ngă hdră mđĭ klei thâo blŭ klei Angle leh anăn klei thâo ñŭ kma tar rŏng lăn kơ phung hriăm gưl prŏng, mkŏ mjing hdră êlan hrăm mbĭt, đru mđĭ kyar phung hriăm gưl prŏng jing mnuih djuê ƀiă. Amai H’Giang Niê, khua bruă êdam êra čar, Khua kiă kriê Êpul hgŭm phung hriăm gưl prŏng Việt Nam čar Dak Lak brei thâo: Phung hriăm gưl prŏng mnuih djuê ƀiă êdah êdi srăng jing dŭm gru hmô bi lar klei hmăng hmưi duh myơr, kpưn đĭ kơ phung mda asei, boh nik jing phung êdam êra hlăm ƀuôn sang.

Hmei ăt hmăng hmưi diñu srăng bi êdah bruă klam hlăm bruă mbĭt mơ̆ng Đoàn, bruă Êpul, bi lar bruă klam kmeh gơ̆ng jing phung hđeh sang hră, phung hriăm gưl prŏng, phung êdam êra mnuih djuê ƀiă hlăm bruă kriê pioh, bi lar knhuah gru dhar kreh djuê ana, nao hgŭm hlăm klei mlih mrô. Hmei hmăng hmưi êpul anei srăng bi lar bruă klam leh anăn hrăm mbĭt hŏng bruă đoàn, êpul hgŭm phung hriăm gưl prŏng hluê ngă jăk dŭm hnơ̆ng čuăn.

Hŏng dŭm hdră êlan hrăm mbĭt, hdră đru, lu phung hđeh sang hră, phung hriăm gưl prŏng mnuih djuê ƀiă ti čar Dak Lak mâo klei jhŏng, čŏng pô hĭn hlăm dŭm hdră bruă. Diñu ăt hur har hluê hriăm, kah mbha klei thâo čiăng mprăp kơ dŭm klei jăk hĭn hlăm êdei anăp hŏng klei hmăng hmưi duh myơr klei thâo, klei mĭn pô kơ yang ƀuôn, kơ ƀuôn sang.