Amai Cil Sa La Môn (djuê ana K’Ho) ti să Dam Rông 4, čar Lâm Đồng ktưn hưn dưi mŭt hlăm êpul Đảng hlăk jing hđeh hriăm gưl prŏng ti Sang hră gưl prŏng Đà Lạt. Thŭn 2015, leh ruĕ hriăm ñu wĭt mă bruă ti să Dă Long hđăp, ară anei jing să Dam Rông 4. Hlăm 10 thŭn hgŭm hlăm bruă êdam êra leh anăn Êpul hgŭm phung mniê să, amai Cil Sa La Môn mâo leh lu klei mbruă, đru mguôp kơ klei mđĭ kyar bruă duh mkra- ala ƀuôn, klei đĭ kyar phung amai adei mniê. Êpul hgŭm să mkŏ mjing leh lu gru hmô “Êpul bi hgŭm phung mniê pla ana rông hluăt mrai:, iêô jak êbeh 25 čô hlăm êpul hgŭm phung mniê. Kah knar grăp gưl rông mâo hlăm brô mơ̆ng 6 truh 8 êklăk prăk. Êpul đru leh 7 gŏ êsei phung mniê tlaih ƀun kyua bruă pla ana rông hluăt mrai. Amai  Cil Sa La Môn brei thâo:

“Kâo pô čiăng lar bra klei thâo săng pô kơ ƀĭng găp, mnuih ƀuôn sang djuê ƀiă pô. Mơ̆ng bruă mă pô čiăng kơ mnuih ƀuôn sang jing mnuih djuê ƀiă thâo săng kơ hdră êlan jăk siam mơ̆ng Đảng leh anăn Knŭk kna jing čang hmăng mđĭ hnơ̆ng jăk klei hdĭp mda bruă duh mkra ala ƀuôn kơ krĭng mnuih djuê ƀiă”

Bi hŏng amai Cil Pam K’Quyên (djuê ana K’Ho), kkiêng thŭn 1989, ti să Lạc Dương, čar Lâm Đồng, leh ruĕ hriăm sang hră gưl prŏng Yersin Đà Lạt, thŭn  2013, ñu wĭt kơ ƀuôn sang leh anăn hgŭm hlăm hdră bruă ti alŭ wăl. Mơ̆ng anăn truh ară anei, ñu găn leh lu bruă klam msĕ si ngă Khua ƀuôn Dà Blah, să Dà Nhim (hđăp), leh anăn Khua dlăng bruă êdam êra să, Khua Êpul hgŭm ƀĭng lŏ hma să, Khua Knơ̆ng bruă mặt trận čar kwar Việt Nam să Dă Nhim hkŏng ngă Khua dlăng bruă Đảng ƀuôn Dà Blah.

 Hlăm hdră mă bruă, Amai Cil Pam K’Quyên gĭr hâo hưn, mtô kơ dŭm hdră êlan mơ̆ng Đảng, knŭk kna, hdră bhiăn knŭk kna truh hŏng dŭm gưl mnuih ƀuôn sang. Ñu bi hgŭm hŏng khua ƀuôn, phung mâo kơhưm, phung khua dlăng bruă klei đăo mtrŭt mjhar mnuih ƀuôn sang đru mguôp êbeh 3.370 hruê ai mă bruă, myơr giăm 5000m2 lăn pioh mkra êlan krĭng ƀuôn sang. Bruă čar kwar Việt Nam să ăt iêô mkrum mkŏ mjing 10 boh sang bi hgŭm đru kơ dŭm gŏ sang dleh dlan. Mơ̆ng boh tŭ dưn hlăm bruă čung ba mnuih ƀuôn sang, bi êdah bruă klam phung mniê hlăm gŏ sang leh anăn ala ƀuôn. Amai  Cil Pam K’Quyên brei thâo:

“Hŏng phung mniê djuê ƀiă hlue si klei bhiăn mă djuê tĭng kơ amĭ, snăn kâo pô  ăt msĕ mơh phung amai adei mniê hlăm alŭ, să čang hmăng đru mguôp aii tiê pô kơ êpul êya, ala ƀuôn. Ƀiădah klă sĭt anăn jing ngă jăk bruă klam phung mniê hlăm gŏ sang, leh anăn ngă jăk bruă ala ƀuôn… Kyua knŏng snăn yơh dưi lar klei hâo hưn gĭr ktưn kpưn đĭ kơ mdrŏng kơ mnuih ƀuôn sang hlăm ƀuôn, boh nik jing phung mniê hgŭm mđĭ kyar bruă duh mkra gŏ sang, mơ̆ng anăn đru mguôp hlăm klei đĭ kyar mbĭt mơ̆ng alŭ wăl.”

   Čar Lâm Đồng  ară anei 500.000 čô hlămm êpul hgŭm. 5 thŭn êgao, dŭm gưl êpul hgŭm đru leh 5000 gŏ êsei phung mniê tlaih ƀun, đru mkŏ mjing mrâo 17 êpul hgŭm bruă  kyua phung mniê kriê dlăng. Êbeh 1.200 hdră bruă, kdrêč bruă phung mniê dưi hlue ngă; pŏk ngă tŭ dưn Hdră bruă 8 hŏng dŭm êtuh gru hmô mđĭ klei mtăp mđơr êkei mniê leh anăn mđĭ kơhưm krĭng mnuih ƀuôn sang djuê ƀiă. Cil Bri,  K’iăng Khua Knơ̆ng bruă djuê ana leh anăn klei đăo čar Lâm Đồng breii thâo, ênoh phung mniê hgŭm hlăm gưl bruă Đảng wưng êgao mâo 13,5%, phung bi ala mniê hlăm Êpul gơ̆ng bruă ƀuôn sang čar mâo giăm 28%; lu amai adie mniê ngă khua gĭt gai knơ̆ng, dhar bruă. Klei anăn bi êdah klei thâo leh anăn kơhưm ƀrư̆ hruê ƀrư̆ dưi bi mklă mơ̆ng phung mniê Lâm Đồng.

" Hlăm wưng êgao, ti krĭng mnuih djuê ƀiă čar Lâm Đồng mâo klei mlih mrâo klă mngač hlăm klei hdĭp, đru mđĭ kyar bruă duh mkra- ala ƀuôn, răng kriê klei êđăp ênang hlăm gŏ sang leh anăn rơ̆ng êđăp ênang tur knơ̆ng jing kyua sa kdrêč đru mguôp lu snăk  mơ̆ng phung amai adei mniê, hlăm anăn mâo klei đru mguôp jăk mơ̆ng phung mnuê đảng viên, ba anăp hlăm bruă mkŏ mjing klei jăk mơak gŏ sang, bi leh jăk bruă ala ƀuôn… Wăt tơdah snăn, phung amai  adei amâo djŏ mâo nanao klei găl ênưih hlăm hdră ngă bruă ala ƀuôn ôh, ƀiădah ya bruă phung amai adei mniê djuê ƀiă ngă đru mguôp leh kơ ƀuôn sang Lâm Đồng jing năng tŭ yap.”