Thiếu tá H’Quý Rơ Chăm dôk mă bruă ti Êpul bruă mtô mblang dhar kreh – Adŭ bruă kđi čar mơ̆ng Knơ̆ng gĭt gai lĭng kahan čar Dak Lak. Êbeh 20 thŭn mă bruă tinei, amai pătdah nao jih leh hlăm krĭng ƀuôn sang dleh dlan mơ̆ng čar, hŏng klei čang hmăng ba asăp mmuñ đru kơ mnuih ƀuôn sang bi mlih klei mĭn, hdră mă bruă, mđĭ klei thâo săng kơ hdră êlan mơ̆ng Đảng, hdră bhiăn mơ̆ng knŭk kna. Mbĭt anăn, hŏng bruă klam jing Khua Êpul bruă mniê Knơ̆ng gĭt gai lĭng kahan čar Dak Lak, mơ̆ng thŭn 2019 truh kơ ară anei, amai H’Qúy Rơ Chăm pŏk ngă tŭ dưn dŭm hdră msĕ si “Phung mniê thâo bruă ala čar, knhêč bruă pưk sang”, “Gru hmô gŏ sang yâo m’ak”, đru rông ba 3 čô anak kahan mâo klei hdĭp dleh dlan, nao hgŭm đru kơ yang ƀuôn ti alŭ wăl.… Thiếu tá H’Quý Rơ Chăm lač kơ bruă si srăng ngă čiăng bi leh jih bruă klam.

 “Hluê grăp wưng, tơdah êpul mâo dŭm bruă prŏng, kâo hnêč mă bruă hlăm hruê mdei, si srăng ngă čiăng bi knar hdră ngă bruă klam lehanăn bruă mă mơ̆ng pô. Wĭt hŏng gŏ sang, kâo gĭr ngă bi leh bruă klam mơ̆ng sa čô amĭ, sa čô mô̆ hlăm gŏ sang”.

Bi hŏng amai Trần Thị Hải Yến, Khua bruă Đảng, pô mă bruă kđi čar Knơ̆ng gĭt gai lĭng kahan wăl krah Quảng Phú, kdriêk Čư̆ Mgar, bruă hriăm mjuăt nanao klei thâo kơ bruă đru leh kơ amai 5 thŭn mâo mă anăn knăl nai mtô bruă kđi čar thâo êdi gưl čar ti Dak Lak. Thŭn 2023, amai nao ti anôk bi lông phung mă bruă kđi čar thâo mbruă hlăm kluôm anôk bruă lĭng kahan mâo Phŭn bruă lĭng kahan mkŏ mjing lehanăn mâo mă klei pah mni mđĭ ai. Amai Trần Thị Hải Yến brei thâo:

Êlâo adih, kâo mă bruă ti Adŭ bruă kriê dlăng hdră bhiăn lehanăn ngă lu hdră mtô mblang ti dŭm alŭ, ƀuôn hlăm alŭ wăl kdriêk kơ bruă hdră bhiăn. Tơdah mă bruă ti Anôk bruă hdră bhiăn Êpul hgŭm bruă ƀuôn sang kdriêk, ăt tuôm ksiêm dlăng bruă ruah hriăm kahan, mâo ksiêm leh lu hră m’ar kơ bruă anei, kyua anăn leh wĭt ngă bruă mtô kơ hdră kđi čar kơ êpul kahan ƀuôn amâo đei dleh dlan ôh. Bi hŏng bruă pŏk ngă hdră răng mgang klei êđăp ênang mơ̆ng bruă lĭng kahan, kâo ăt gĭr mă bruă êjai hriăm êjai, gĭr bi leh jih bruă klam mâo kčah jao.

        Thâo mbruă bruă ala čar, wăt amai H’Quý lehanăn Hải Yến knhêč bruă pưk sang, krơ̆ng kjăp klei h’uh mđao kơ gŏ sang. Ayŏng Lê Ngọc Nghĩa, ung amai Hải Yến, brei thâo, thâo săng bruă mô̆ pô mă, ñu mprăp nanao hdră đru kơ bruă hlăm pưk sang.

 “Tơdah mô̆ mâo bruă mjêč, pô srăng đru dlăng kriê anak. Mđĭ ai anak aneh hluê gru mngač mơ̆ng amĭ čiăng mtô kơ phung anak, jing bruă sĭt, mnuih sĭt. Lu blư̆ ăt mjing klei ktưn hưn čiăng kơ phung anak gĭr ktưn msĕ si amĭ diñu.

Lač kơ H’Quý Rơ Chăm lehanăn Trần Thị Hải Yến, Đại tá Trần Minh Trọng – Khua bruă Đảng Knơ̆ng gĭt gai lĭng kahan čar Dak Lak brei thâo, anei jing mnuih kdlưn hĭn hlăm hdră bi lông ktưn mơ̆ng čar wưng êgao.

 “H’Quý Rơ Chăm lehanăn Trần Thị Hải Yến klă sĭt jing boh tâo mngač hlăm hdră bi lông ktưn mơ̆ng êpul djă phao ktuang mơ̆ng čar wưng thŭn 2019 – 2024. Anei klă sĭt jing “Knuh mnga siam” hlăm đang mnga bi ktưn mơ̆ng êpul kahan čar, mjing ai lar bra hlăm phung knuă druh, lĭng kahan, phung mniê hlăm Êpul kahan djă phao ktuang čar Dak Lak”.

Đại tá Trần Minh Trọng mñă, jiă kma asăp Awa Hô mtă “Bi ktưn jing khăp kơ ala čar, khăp kơ ala čar brei mâo klei bi ktưn. Mnuih bi lông ktưn jing mnuih khăp kơ ala čar, dŭm thŭn êgao, hdră bi ktưn hlăm êpul kahan čar Dak Lak ƀrư̆ hruê ƀrư̆ êlam hĭn. Mơ̆ng hdră anei, mâo leh dŭm pluh čô mnuih, êpul êya kdlưn hĭn, hŏng lu gru hmô jăk, hdră ngă jăk, đru mkŏ mkra êpul kahan čar Dak Lak ƀrư̆ hruê ƀrư̆ kjăp ktang, knhâo, dưi bi leh jih bruă klam hlăm boh klei mrâo./.