VOV4.Êđê - Phŭn bruă dhar kreh, mjuăt ktang asei mlei leh anăn hiu čhưn ênguê bi mguôp hŏng dŭm phŭn bruă djŏ tuôm čiăng mâo klei ktrâo lač klă kơ grăp boh klei êjai wĭt pŏk ƀăng bruă hiu čhưn ênguê leh anăn ba mdah hlăm hruê kăm kơ anăp. Anei jing klei mñă ktang mơ̆ng k’iăng Khua knŭk kna Vũ Đức Đam hlăm klei kƀĭn hdră êlan wĭt pŏk ƀăng bruă hiu čhưn ênguê hlăm wưng hdĭp êđăp ênang, hŏng klei mbruă, ksiêm dlăng tŭ dưn klei ruă tưp Covid-19, nao mbĭt hŏng ƀrư̆ ƀrư̆ krŭ wĭt bruă duh mkra ala ƀuôn. Hlăm klei kƀĭn anăn, pô bi ala dŭm phŭn bruă bi trông klă klơ̆ng leh kơ dŭm boh klei leh anăn bi tŭ ư hdră êlan pŏk ƀăng bruă hiu čhưn ênguê tar rŏng lăn mơ̆ng hruê 15/3/2022. Blŭ mklin klei kƀĭn anăn, k’iăng Khua knŭk kna Vũ Đức Đam mñă klă: Ară anei drei srăng mjêč bi mguôp grăp phŭn bruă, dhar bruă, jao kơ phŭn bruă dhar kreh jing pô mă bruă hŏng phŭn bruă mdrao mgŭn leh anăn dŭm phŭn bruă mkăn čiăng mâo klei ktrâo lač, hưn mdah hŏng knŭk kna bi klă bruă mkăp brei Visa.

Y-Ƀel pô mblang