Hruê anei 26/7, Knăm čang ênuh Khua gĭt gai Đảng Nguyễn Phú Trọng ăt lŏ dơ̆ng mkŏ mjing ti Sang čang ênuh ala čar, mrô 5 êlan Trần Thánh Tông, ƀuôn prŏng Hà Nội, kčưm mơ̆ng 7 mmông aguah truh kơ 1 mmông tlam. Knăm bi hdơr kơ klei hdĭp Khua gĭt gai Đảng Nguyễn Phú Trọng dưi mkŏ mjing 1 mmông tlam hruê anei 26/7 ti Sang čang ênuh ala čar, mrô 5 êlan Trần Thánh Tông, ƀuôn prŏng Hà Nội. Knăm dơr djiê mkŏ mjing 3 mmông tlam hlăm hruê ti Msat Mai Dịch, ƀuôn prŏng Hà Nội.

Êpul mkŏ mjing knăm čang ênuh Khua gĭt gai Đảng Nguyễn Phú Trọng brei thâo, mơ̆ng 7 mmông aguah  truh kơ 7 mmông krah mmăt mbruê 25/7, mâo 1.565 Êpul ( hŏng hlăm brô 55.600 gưl čô), jing phung bi ala khua gĭt gai Đảng, knŭk kna, dŭm Phŭn, dhar bruă, alŭ wăl, anôk bruă, êpul lĭng kahan yang ƀuôn, êpul bruă hŏng tač êngao, bi ala dŭm êpul bruă leh anăn mah jiăng tar rŏng lăn, mnuih ƀuôn sang nao čang ênuh, bi juh mbĭt hŏng gŏ sang Khua gĭt gai Đảng Nguyễn Phú Trọng, ti Sang čang ênuh ala čar, mrô 5 êlan Trần Thánh Tông, ƀuôn prŏng Hà Nội, Anôk bi kƀĭn Thống Nhất, ƀuôn prŏng Hồ Chí Minh leh anăn ti ƀuôn sang Khua gĭt gai Đảng Nguyễn Phú Trọng, alŭ Lại Đà, să Đông Hội, kdriêk Đông Anh, ƀuôn prŏng Hà Nội.