Thŭn anei mâo 3.508 klei bi lông mơ̆ng 125 anôk bruă klei mrâo. Lu klei bi lông dưi tĭng dlăng jăk, ba yua tŭ dưn lu kdrăp mrâo, hưn lač klă ktuê êlan 80 thŭn mkŏ mkra lehanăn đĭ kyar mơ̆ng Anôk bruă kƀĭn ala Việt Nam. Êpul hgŭm ksiêm dlăng mâo 6 êpul điêt: Hră klei mrâo čih, Hră klei mrâo điện tử, Mđung asăp, Mđung rup, Hră klei mrâo rup lehanăn dŭm klei čih ngă leh hdră ksiêm dlăng lehanăn ruah 90 klei čih êdah êdi mŭt hlăm tuôr bi lông knhal tuič, mâo: 15 Hră klei mrâo čih, 20 Hră klei mrâo điện tử, 15 hdră Mđung asăp, 15 hdră Mđung rup, 10 Hră klei mrâo rup, 15 klei čih.

Dŭm klei bi lông anei rơ̆ng hnơ̆ng tŭ jăk, bi êdah jăk mta phŭn, asăp hưn mthâo, hưn lač djăp ênŭm 3 bruă phŭn mơ̆ng anôk bruă kƀĭn ala, čih mkra klei bhiăn, ksiêm dlăng gưl dlông lehanăn bi mklă dŭm bruă yuôm bhăn mơ̆ng Ala čar mbĭt anăn bi mklă mta phŭn 80 thŭn hruê mkŏ mjing, mđĭ kyar anôk bruă kƀĭn ala Việt Nam./.