VOV4.Êđê- Phŭn bruă Sang hră m’ar mtô bi hriăm brei thâo: Jih jang 63 čar, ƀuôn prŏng brei leh phung hđeh nao sang hră hriăm klă anăp. Ênoh hđeh nao hriăm klă anăp tĭng truh hruê 18/4 mâo 99,57%. Leh klei gĭt gai lŏ pŏk ƀăng sang hră, phung khua kiă kriê Phŭn bruă sang hră m’ar nao ksiêm dlăng leh bruă pŏk ngă ti dŭm alŭ wăl. Boh sĭt brei ƀuh, dưi lŏ nao sang hră jing klei čang hmăng prŏng êdi mơ̆ng phung hđeh, nai mtô lehanăn amĭ ama. Dŭm alŭ wăl čih mkra leh hdră kčah, mprăp dŭm klei găl čiăng lŏ brei phung hđeh nao sang hră hŏng klei êđăp ênang. Dŭm anôk bruă mtô bi hriăm lŏ ksiêm dlăng, bi mklă hnơ̆ng thâo mơ̆ng phung hđeh leh sa wưng hriăm online čiăng mprăp lŏ mkra mlih hdră mtô bi hriăm djŏ guôp hŏng hnơ̆ng thâo mơ̆ng hđeh lehanăn hdră ksiêm dlăng klei ruă tưp Covid 19 ti alŭ wăl. Phŭn bruă Sang hră m’ar brei thâo, hluê si hdră kčah mtô bi hriăm mơ̆ng sang hră, bruă ksiêm dlăng, tĭng mkă hnơ̆ng thâo hluê hdră klă anăp ti sang hră dưi hluê ngă leh sa wưng phung hđeh dưi hriăm mbŏ klei thâo./.

                                                   Pô mblang: H’Nêč Êñuôl