Tŭ ư klei khua knŭk kna “500 hrue mlam mkra truh 3.000 km êlan” mơ̆ng krah mlan 8/2024, dŭm êpul bruă mkra êlan dơ̆ng pral Khánh Hòa – Ƀuôn Ama Thuôt tiŏ nao leh dŭm êtuh čô kỹ sư, mnuih mă bruă mă bruă hrue lehanăn mlam amâo mâo mdei. Hŏng boh taih êlan dôk mkra jing 117,5 km, hŏng 4 grông êdeh, ênoh bi liê jih jang tĭng giăm 2.000 êklai prăk, ktưn bi leh hlăm knhal jih thŭn 2026 lehanăn srăng ba yua hlăm thŭn 2027.

Truh ară anei, 2 boh ƀăng mur nao mdua hŏng boh taih êbeh 1.700 m hlăm êlan dơ̆ng pral anei mkŏ dua boh čar Khánh Hòa lehanăn Daklak mâo hluh leh, tinăn ƀăng tĭng kơ hnuă bi leh mâo 82% hnơ̆ng bruă knuă. Hŏng ai tiê mjêč pral, mă bruă amâo mâo mdei, dŭm êpul êya ngă bruă dôk ngă kñăm bi sĭt hdră êlan ala čarkñăm./.