Êlan mlir kdriêk Čư̆ Sê – Čư̆ Pưh – Čư̆ Prŏng, čar Gia Lai mâo boh taih dlông êbeh 32 km, msĕ si sa blah mnal găn krĭng lŏ hma, êa krông, wăl dliê, mkŏ hŏng Êlan dơ̆ng prŏng mrô 25, Êlan dơ̆ng prŏng mrô 14, găn lu să, wăl krah mơ̆ng 2 kdriêk Čư̆ Pưh, Čư̆ Sê, truh ti dŭm să dleh dlan mơ̆ng kdriêk knông lăn Čư̆ Prŏng. Êlan mrâo mkra, ka dưi ƀuh ti hră kak lăn, ƀiădah boh sĭt mâo leh lu êdeh êran. Mai Thế Chiến, alŭ Hợp Hòa, să Ia Drăng, kdriêk Čư̆ Prŏng brei thâo, ñu ƀuh klă klei “Dleh dlan êdi”. Ktuê êlan anei tuôm tlă anăp hŏng klei tla wĭt prăk duh bi liê kyua êmưt ngă bruă, ƀiădah knhal tuič dưi bi leh êlâo kơ thŭn mrâo, ba lu klei găl mđĭ kyar kơ mnuih ƀuôn sang hlăm krĭng:

Êlâo adih klei găn êrô hmei tinei dleh dlan êdi, Mơ̆ng sang kâo nao truh ti să Ia Gar amâo dah Ia Mer kreh găn lo ktuê êlan, mđiă ƀhŭl hjan kdlŭt. Ktuê êlan anei dưi ngă leh mbĭt anăn mâo ba yua mjing leh klei găl kơ mnuih ƀuôn sang hlăm bruă hrui blei mnơ̆ng lŏ hma, mjing klei găl kơ mnuih ƀuôn sang mâo arăng nao blei ti sang, ênoh čhĭ đi. Tal tlâo jing, ktuê êlan anei pŏk lu klei găl kơ hdră duh ƀơ̆ng mơ̆ng mnuih ƀuôn sang, boh nik ti krĭng knông lăn dleh dlan anei.

Mbĭt hŏng dŭm hdră bruă êlan klông dưi ngă leh hlăm thŭn 2023, krĭng Lăn dap kngư ăt mâo lu hdră dơ̆ng ngă leh amâo dah dôk ngă mkra lehanăn mrâo pŏk ngă. Sa hlăm dŭm hdră anăn jing ktuê êlan mkŏ hŏng dŭm să Ia Mlă, Đất Bằng, Phú Cần truh ti wăl krah Phú Túc, kdriêk Krông Pa čar Gia Lai, mâo boh taih dlông êbeh 8km, hŏng ênoh duh 90 êklai prăk. Hluê si Hồ Văn Thảo, Khua anôk bruă sang čư̆ êa kdriêk Krông Pa, ktuê êlan anei dưi ngă leh giăm 100% ênoh bruă lehanăn srăng mđĭ lar boh tŭ dưn klă sĭt, mtrŭt mđĭ bruă lŏ hma lehanăn mnia mblei.

Ktuê êlan anei săn sa krĭng êbeh 1.000 hecta lăn pla mjing lehanăn hlăm krĭng krih êa mơ̆ng Knơ̆ng êa Ia Mlă. Kyua anâ̆n dưi lač ktuê êlan anei srăng mđĭ lar boh tŭ dưn ngă kơ ênoh bi liê hlăm hdră duh mkra pla mjing mơ̆ng mnuih ƀuôn sang dưi hrŏ lu lehanăn mkra mđĭ hnư hrui wĭt. Leh anăn tơdah duh bi liê hlăm ktuê êlan anei mnuih ƀuôn sang hơ̆k êdi. Êlâo adih, ktuê êlan anei luič 2 hruê mkrah kơh lehanăn knŏng êdeh ph’phŭt dưi êrô snăn ktuê êlan anei leh mkra, jih jang mnơ̆ng lŏ hma lehanăn mnơ̆ng dhơ̆ng plah wah Phú Túc, Ia M’lá lehanăn Phú Cần srăng găl hĭn.

Mbĭt hŏng dŭm ktuê êlan mkŏ krĭng ƀuôn sang, hdră găn êrô ti krĭng ƀuôn prŏng hlăm Lăn dap kngư ăt mâo klei mđing duh bi liê. MSĕ si ti Lâm Đồng, êngao kơ hdră pŏk mlar kčŭn čư̆ Prenn mkŏ ƀuôn prŏng Đà Lạt hŏng kdriêk Đức Trọng mrâo ngă leh, lŏ mâo dŭm pluh hdră mkăn ti Đà Lạt dôk dưi pŏk ngă. Ti Dak Lak, êlan dơ̆ng prŏng Ngŏ Yŭ (êlan Nguyễn Chí Thanh) mk tač êdeh phiơr Ƀuôn Ama Thuôt hŏng wăl krah ƀuôn prŏng klă klơ̆ng dưi ba yua. Êlan dơ̆ng mrô 1 mkŏ Ƀuôn Ama Thuôt hŏng kdriêk Ƀuôn Đon dôk dưi mkra mđĭ. Hdră êlan klông mkŏ Êlan dơ̆ng prŏng mrô 26 – Êlan dơ̆ng prŏng mrô 14 - Êlan dơ̆ng prŏng mrô 8 lehanăn Hdră pŏk mlar êlan Giải Phóng, ƀuôn prŏng Ƀuôn Ama Thuôt dôk dưi pŏk ngă. Wăl krah Plei Kần, kdriêk Ngọc Hồi, čar Kon Tum ăt dôk bi mlih prŏng hŏng Hdră êlan klông ti nah Dhŭng wăl krah, hŏng ênoh duh êbeh 320 êklai pr ăk. Phạm Thị Thủy, mnuih ƀuôn sang ti wăl krah brei thâo, hdră êlan klông anei amâo djŏ knŏng đru kơ mnuih ƀuôn sang ti nah Dhŭng wăl krah truh ti krĭng ƀuôn prŏng jăk găl hĭn ƀiădah lŏ đru mjing klei găl mnia mblei, mtrŭt mđĭ wăl krah Plei Kần truh giăm hĭn hŏng mta kñăm:

Mnuih ƀuôn sang tinei m’ak êdi kyua mâo êlan anei. Ktuê êlan anei siam, jăk găl, nao kơ krĭng wăl krah phŭn giăm mơh, êlan jăk găl, hdră mnia mblei čhĭ mnơ̆ng dhơ̆ng ăt găl ênưih hĭn mơh.

Tơ dŭm hdră êlan klông dŭm êtuh êklai prăk dôk krŭ wĭt klei găl mâo, mkŏ hgŭm mlir kdriêk, mlir să snăn dŭm hdră bruă êlan klông êbâo êklai dôk đru kơ dŭm čar krĭng lăn dap kngư ƀrư̆ mjing dŭm wăl anôk duh mkra phŭn mâo boh tŭ yuôm, hlăm ênoh anăn mâo Hdră bruă êlan êran pral Ƀuôn Ama Thuột -Khánh Hòa, hŏng ênoh duh giăm 22 êbâo êklai prăk.

Hluê si hdră kčah truh thŭn 2030, hnơ̆ng trah dlăng truh kơ thŭn 2050, êlan êran pral anei jing ktuê êlan phŭn čiăng mkŏ mjing 1 hlăm 5 wăl duh mkra phŭn ti krĭng lăn dap kngư, hŏng klei mđing tal êlâo jing hiu čhưn ênguê lehanăn dŭ mdiăng mnơ̆ng dhơ̆ng. Dưi ngă mkra mơ̆ng mlan 6 thŭn 2023, êlan êran pral Ƀuôn Ama Thuôt – Khánh Hòa ƀuh leh pŏk rup. Đặng Thọ Dần, K’iăng khua Adŭ bruă kriê dlăng êlan klông, Anôk kriê dlăng dŭm hdră bruă êlan klông lehanăn bruă Lŏ hma mđĭ kyar krĭng ƀuôn sang čar Dak Lak brei thâo, hdră anei dôk mjêč hluê ngă.

 “Ară anei, leh mâo anôk ala, phung ngă mkra srăng mjêč hluê ngă, čuk hli rŭ mdơ̆ng mkăp kơ bruă mkra ktuê êlan anei. Msĕ si hdră tal 1 snăn 100% mâo leh êlan mprăp kơ hdră mkra. Hră tal 1 ăt dưi leh 70% mơh. Hdră tal 3 phŭn tal êlâo dưi ngă lehanăn mâo anôk bruă ngă mkra dôk pŏk hluê ngă.

2023 jing thŭn dŭm čar krĭng Lăn dap kngư tuôm hŏng lu klei dlan dlan kơ hdră mtrŭt mđĭ kyar bruă duh bi liê knŭk kna, ƀiădah hdră anei dưi mkra mđĭ hlăm dŭm mlan knhal jih thŭn lehanăn dưi mkra mđĭ klă nik hĭn hlăm dŭm mlan akŏ thŭn 2024, boh nik hŏng hdră bruă êlan klông.

Dŭm hdră bruă êlan klông hlăm krĭng, dŭm hdră mlir krĭng dưi pŏk ngă kjăp, ƀrư̆ ƀrư̆ bi mkŏ dŭm hdră duh mkra mơ̆ng grăp čar, mơ̆ng kluôm krĭng lehanăn wăl krĭng kwar Krah – Lăn dap kngư, mjing boh kdrŭt mđĭ kyar bruă duh mkra ala ƀuôn./.