Tlam mbrue 20/9, Khua bruă mặt trận čar kwar gưl dlông Việt Nam Đỗ Văn Chiến mâo tŭ mă leh mơ̆ng dŭm êpul mơ̆ng Phŭn bruă hŏng tač êngao, dŭm anôk bruă bi ala lehanăn phung duh mkra hlăm ala čar lehanăn mơ̆ng ala tač êngao mơĭt đru kơ mnuih ƀuôn sang hmăi mơ̆ng klei angĭn êbŭ 3 ngă.

Snăn, truh 5h00 hrue mbrue 20/9, Êpul mtrŭt mjhar klei đru dŏng gưl dlông mâo tŭ mă leh truh 1.628 êklai prăk. Mơ̆ng ênoh prăk mâo bi mkrum anei, êpul mtrŭt mjhar bruă đru dŏng gưl dlông mbha leh 1.035 êklai prăk truh hŏng 26 alŭ wăl mghaih msir boh mơ̆ng klei angĭn êbŭ.  Blŭ hrăm ti anôk tŭ mă anăn, Khua bruă mặt trận čar kwar gưl dlông Việt Nam Đỗ Văn Chiến mâo klei lač jăk kơ jih jang phung thâo bi đru, boh nik hŏng dŭm anôk bruă mơ̆ng ala tač êngao msĕ si China, Thái Lan ti Việt Nam, phung duh mkra, êpul hgŭm mnuih Việt Nam ti Thái Lan, Êpul hgŭm mnuih Việt Nam ti Ucraina lehanăn mnuih ƀuôn sang Việt Nam dôk hdĭp hlăm dŭm ala čar dlông rŏng lăn, mâo leh ai tiê kmah bi đru hŏng mnuih ƀuôn sang găn klei jŭ jhat mơ̆ng angĭn êbŭ yagi ngă, kñăm ba yua djŏ mta kñăm, lehanăn mâo klei kiă kriê kjăp mơ̆ng mnuih ƀuôn sang lehanăn yang ƀuôn./.