VOV4.Êđê - “Hnưm mâo hdră msir mghaih klei mđĭ ênoh čhĭ lăn, ba lu klei truh amâo jăk hlăm hdră mđĭ kyar bruă duh mkra ala ƀuôn”. Anei jing klei mtă mơ̆ng Êpul bi ala anôk bruă kƀĭn ala čar Dak Lak ti anôk mă bruă hŏng Knơ̆ng bruă Ngăn dŏ – Wăl hdĭp mda kơ bruă hluê ngă hdră mtrŭn, hdră bhiăn mkiêt mkriêm, bi kdơ̆ng hŏng klei bi liê, wưng thŭn 2016-2021 hlăm hruê 13/4. Hluê si Knơ̆ng bruă Ngăn dŏ – Wăl hdĭp mda čar Dak Lak, ksiêm yap 3 mlan akŏ thŭn 2022, klei ngă hră m’ar lăn ala ti alŭ wăl đĭ lu êdi, truh 103.000 gưl, đĭ giăm 200% mkă hŏng wưng anei thŭn êlâo.

Ênoh čhĭ lăn ăt đĭ lu êdi mkă hŏng 3 mlan gưl 4 thŭn 2021. Ti anăp klei anei, Knơ̆ng bruă Ngăn dŏ – Wăl hdĭp mda mâo leh hră m’ar đru kčĕ hŏng Anôk bruă sang čư̆ êa čar gĭt gai dŭm kdriêk ksiêm dlăng kjăp bruă bi mlih mta kñăm ba yua lăn. Êpul ksiêm dlăng mơ̆ng bruă kƀĭn ala mtă kơ Knơ̆ng bruă Ngăn dŏ – Wăl hdĭp mda čar Dak Lak mđĭ hdră hâo hưn, mtô mblang kơ hdră bhiăn čiăng hluê ngă klei mkiêt mkriêm, bi kdơ̆ng hŏng klei bi liê tŭ dưn. Mbĭt anăn, mđing kriê dlăng ngăn prăk knŭk kna, mnuih mă bruă, ngăn drăp djŏ si klei kčah mtrŭn, rơ̆ng ba yua djŏ mta kñăm mơ̆ng lăn ala, mnơ̆ngčŏng mâo hlăm gŭ lăn, êa tŭ dưn lehanăn h’ĭt kjăp./.

H’Nêč pô mblang