Klei bi kƀĭn dưi mkŏ mjing klă anăp ti Anôk bruă Êpul gơ̆ng bruă ƀuôn sang čar lehanăn online hŏng dŭm kdriêk Čư̆ Mgar, Krông Ana, Mdrak, Êa Kar, Krông Bông, Lăk. Êbeh 1200 čô nao ti knăm anei. Blŭ ti anôk bi kƀĭn, Êpul bi ala anôk bruă kƀĭn ala čar Dak Lak lač jăk dŭm klei blŭ đru mguôp mơ̆ng mnuih ƀuôn sang. Mbĭt anăn bi trông, bi mklă leh dŭm mta bruă mâo mnuih ƀuôn sang dôk mđing. Dŭm klei alŭ đru mguôp srăng mâo Êpul bi ala čih pioh, bi mklin, hnưm msir mghaih djŏ hŏng klei kčah mtrŭn, mkăp djŏ hŏng klei čiăng mơ̆ng mnuih ƀuôn sang.

Hlăm 2 hruê mơ̆ng 30/11 – 1/12, Êpul bi ala bruă kƀĭn ala čar Dak Nông ngă leh dŭm klei kƀĭn trông bi tuôm hŏng phung bi ala ti să Dak N’Drot ( kdriêk Dak Mil), să Tâm Thắng (kdriêk Čư̆ Jŭt), să Dak Hòo ( kdriêk Dak Song) leh anăn ƀuôn hgŭm Quảng Thành ( ƀuôn prŏng Gia Nghĩa). Hlăm dŭm mmông bi tuôm, leh hmư̆ phung bi ala bruă kƀĭn ala hưn mdah boh tŭ klei kƀĭn tal 6, bruă kƀĭn ala gưl 15, phung bi ala bi êdah klei hơ̆k mơak kyua klei tŭ jing mơ̆ng klei kƀĭn leh anăn yap yuôm bhăn dŭm klei gĭr mơ̆ng phung bi ala bruă kƀĭn ala čar Dak Nông hmao hưn mdah lu boh klei mjêč hlăm boh sĭt, djŏ guôp hŏng klei hmăng hmưi phung bi ala.

Phung bi ala čar Dak Nông ăt akâo brei ngă jăk hĭn bruă bi hơĭt klei hdĭp yang ƀuôn, đru kơ ênua bruă mdrao mgŭn kơ mnuih ƀuôn sang dleh dlan, boh nik jing prăk mlan, hdră đru kơ phung mă bruă mdrao mgŭn, phung nai mtô, leh anăn mgaih msir klei kƀah êa drao, kƀah vaccine tlŏ kơ phung hđeh.