VOV4.Êđê - Hruê 20/5, Êpul bi ala bruă kƀĭn ala čar Dak Lak mkŏ mjing klei bi kƀĭn mă klei blŭ mguôp kơ dŭm hră čih Hdră bhiăn srăng mâo Bruă kƀĭn ala ba mdah ksiêm dlăng hlăm klei bi kƀĭn tal 3, Bruă kƀĭn ala tal XV kơ anăp. Dŭm hră čih hdră bhiăn mâo Êpul bi ala bruă kƀĭn ala čar Dak lak mă klei blŭ mguôp mâo: Hdră bhiăn ksiêm dlăng (lŏ mkra mlih), Hdră bhiăn hlue ngă klei êngiê kơ mnuih ƀuôn sang, Hdră bhiăn êa pui êwa čuh (lŏ mkra mlih), Hdră bhiăn gang mkhư̆ klei ngă jhat hlăm gŏ sang, Hdră bhiăn ksiêm mkă, mdrao klei ruă (lŏ mlih mrâo) leh anăn Hdră bhiăn mbŏ dŭm mta mơ̆ng Hdră bhiăn êlan klei pui kmlă.

Mguôp klei blŭ hlăm hră čih Hdră bhiăn hlue ngă klei êngiê kơ mnuih ƀuôn sang, phung bi ala mtă brei mkŏ mjing klei bhiăn leh anăn hdră kčah, ktrâi lač klă klơ̆ng kơ bruă đŭ bi kmhal hŏng prăk kơ klei ngă soh hdră bhiăn hlue ngă klei êngiê kơ mnuih ƀuôn sang; brei kčah djăp ênŭm, klă mngač, hră mơar yang ƀuôn ksiêm dlăng bruă sang čư̆ êa alŭ wăl gưl să kơ klei êngiê kơ mnuih ƀuôn sang ti să, ƀuôn hgŭm, wăl krah. Brei kčah klă hĭn kơ bruă klam mơ̆ng Anôk bruă ksiêm dlăng yang ƀuôn hlăm anôk bruă duh mkra kñăm rơ̆ng bruă phung mă bruă ktuê dlăng phung yua mnuih mă bruă./.

H’ Zawut pô mblang