VOV4.Êđê - Ƀri wưng bi hdơr 77 thŭn hruê krŭ kdơ̆ng mlan 8, 77 thŭn hruê knhuah gru kahan ksiêm yang ƀuôn 19/8 leh anăn 17 thŭn hruê jih jang mnuih ƀuôn sang răng mgang klei êđăp ênang ala čar, Aguah mbruê 19/8, ti Hà Nội, êpul bi ala Bruă Đảng kahan ksiêm gưl dlông leh anăn phŭn bruă kahan ksiêm mơ̆ng Đại tướng Tô Lâm, khua hlăm phŭn bruă kđi čar, khua phŭn bruă kahan ksiêm ba anăp nao dưm kwang mnga, nao čuă msat khua gĭt gai Hồ Chí Minh.

Găn leh 77 thŭn mkŏ mjing, ngă bruă leh anăn đĭ hriê kơ prŏng, êpul êya kahan ksiêm yang ƀuôn mbĭt hŏng Đảng, jih jang mnuih ƀuôn sang, lĭng kahan dưi mâo lu bruă ngă kdlưn hĭn hlăm bruă bi kdơ̆ng sua wĭt klei êngiê kơ djuê ana, hluh hlir ala čar, mkŏ mjing leh anăn răng mgang ala čar. Ară anei, hlăm wưng mrâo, mâo lu mta klei lông dlăng leh anăn klei găl pluă mbĭt, čiăng ngă jăk hĭn bruă klam jing êpul kmeh gơ̆ng hlăm bruă răng mgang klei êđăp ênang ala čar, klei êđăp ênang yang ƀuôn, Đảng, knŭk kna leh anăn mnuih ƀuôn sang drei čiăng kơ êpul kahan ksiêm yang ƀuôn lŏ dơ̆ng bi lar knhuah gru jhŏng ktang, hing ang, gĭr ktưn amâo mâo mdei, hgao djăp klei dleh dlan, klei lông dlăng, bi leh jăk bruă klam dưi jao.

Y-Bel pô mblang