VOV4.Êđê - Aguah mbruê 19/9, Êpul ksiêm dlăng mrô 4 mơ̆ng Êpul gĭt gai gưl dlông kơ bruă gang mkhư̆ klei ƀơ̆ng ngăn, klei amâo mâo jăk mâo Đại tướng Tô Lâm, khua hlăm phŭn bruă kđi čar, Khua phŭn bruă kahan ksiêm jing khua êpul mâo leh mmông mă bruă hŏng Êpul khua bruă Đảng čar Gia Lai čiăng hưn mdah kơ boh tŭ ksiêm dlăng bruă gang mkhư̆ klei ƀơ̆ng ngăn, klei amâo mâo jăk ti alŭ wăl.

Bi klă hlăm mmông mă bruă, Đại tướng Tô Lâm mñă klă, Êpul khua bruă Đảng čar Gia Lai lŏ dơ̆ng mđĭ hĭn klei gĭt gai, ktrâo lač kñăm mđĭ klei thâo săng, bruă klam mơ̆ng dŭm gưl bruă, bruă sang čư êa alŭ wăl hlăm bruă hmao ƀuh, tŭ mă, mgaih msir klei kčŭt hưn, klei hưn mdah dŭm mta bruă mâo klei bi knăl ngă soh hlăm klei ƀơ̆ng ngăn, bruă duh mkra, klei amâo mâo jăk. Đại tướng Tô Lâm mtă kơ čar Gia Lai čiăng mâo klei uêñ mĭn, kñăm kơ klei gĭt gai dŭm anôk bruă djŏ tuôm hnưm hmao ƀuh dŭm klei hưn phung ngă soh hlăm bruă kriê dlăng lăn ala, ngăn dŏ, răng mgang dliê, ƀuah mkra ktang phĭt grăp êpul êya, grăp čô ngă soh, bi mhuĭ, gang mkhư̆ phung ngă soh hlăm alŭ wăl.

Y-Ƀel pô mblang