VOV4.Êđê - Aguah mbruê 20/5, Êpul gơ̆ng bruă ƀuôn sang ƀuôn prŏng Hà Nội gưl 16, mkŏ mjing klei bi kƀĭn thơ̆ng kơ bruă kñăm ksiêm dlăng, bi trông bruă dăp, mbha prăk kơ hdră bruă mkra êlan dar mrô 4- krĭng ƀuôn prŏng čiăng mbŏ hlăm hră mơar hưn mdah hŏng bruă kƀĭn ala ksiêm dlăng. Anei jing hdră bruă yuôm bhăn ala čar mâo Bruă kƀĭn ala duh bi liê.

Hŏng 100% ênoh phung bi ala tŭ ư, Êpul gơ̆ng bruă ƀuôn sang ƀuôn prŏng Hà Nội bi tŭ ư hdră mĭn tĭng prăk hlue ngă Hdră bruă duh bi liê rŭ mkra êlan dar mrô 4 - Krĭng ƀuôn prŏng phŭn dưi bi liê mơ̆ng prăk knŭk kna ƀuôn prŏng hlăm brô êbeh 23 êbâo 520 êklai prăk. Hdră bruă dlông 112 km găn 3 čar, ƀuôn prŏng Hà Nội, Hưng Yên leh anăn Bắc Ninh. Anôk phŭn ti êlan dơ̆ng êran pral Nội Bài - Lào Cai hlăm kdriêk Sóc Sơn, ƀuôn prŏng Hà Nội, anôk knhal tuič hlăm êlan dơ̆ng êran pral Nội Bài - Hạ Long hlăm kdriêk Quế Võ, čar Bắc Ninh. Mĭn tĭng prăk bi liê êbeh 85 êbâo 800 êklai prăk, wưng hlue ngă mơ̆ng thŭn 2022 truh thŭn 2027./.

H’ Nêč pô mblang