VOV4.Êđê- Hruê mbruê 19/8, Êpul gơ̆ng bruă ƀuôn sang čar Dak Lak gưl 10, wưng thŭn 2021 – 2026 mkŏ mjing klei kƀĭn thơ̆ng kơ klei čih gưl tal 5 čiăng ksiêm dlăng, bi klă lu hdră mtrŭn prŏng. Hlăm klei kƀĭn, phung bi ala ksiêm dlăng, bi klă 12 hdră mtrŭn yuôm bhăn, hlăm anăn mâo 7 hdră mtrŭn djŏ tuôm hŏng 3 hdră ala čar kñăm mđĭ kyar bruă duh mkra, ala ƀuôn krĭng mnuih djuê ƀiă leh anăn čư̆ čhiăng, hdră bi hrŏ ƀun, mkŏ mkra krĭng ƀuôn sang mrâo wưng thŭn 2021 – 2025.

Klă klơ̆ng, hdră mtrŭn kơ klei mđĭ kyar bruă duh mkra ala ƀuôn krĭng mnuih djuê ƀiă leh anăn čư̆ čhiăng thŭn 2022, čar srăng bi hrŏ 3,5% ênoh gŏ sang ƀun ƀin. Kluôm ngăn prăk hluê ngă mta kñăm anei jing êbeh 443 êklai prăk. Hdră mtrŭn hluê ngă hdră ala čar knăm mkŏ mkra krĭng ƀuôn sang mrâo, truh ti thŭn 2025, Dak Lak gĭr ktưn mâo 4 anôk bruă gưl kdriêk, 100 să mâo ênŭm hnơ̆ng čoh čuăn krĭng ƀuôn sang mrâo. Čiăng mâo dŭm mta kñăm anăn, Êpul gơ̆ng bruă ƀuôn sang čar Dak Lak bi klă hdră ngăn prăk duh bi liê mđĭ kyar ngăn prăk ala čar wưng 5 thŭn 2021 -2025 jing 1.557 êklai prăk. Hlăm anăn ngăn prăk gưl dlông jing 657 êklai prăk, ngăn prăk čar jing 900 êklai prăk.

Pô mblang: Y-Ƀel Êban