Thŭn anei, mbĭt hŏng bruă mkŏ mjing klei bi kƀĭn êpul gơ̆ng bruă ƀuôn sang, klei bi tuôm hŏng mnuih ƀuôn sang grăp gưl leh anăn dŭm klei bi kƀĭn hlue si akŏ, Êpul gơ̆ng bruă ƀuôn sang srăng mđĭ ktang bruă ktuê dlăng.

Hlăm anăn, kƀĭn hlăm dŭm bruă msĕ si: Ktuê dlăng kơ boh tŭ hlue ngă Hdră bruă rŭ lŏ pla mrâo kphê  ti čar hlăm wưng 2018-2020; ktuê dlăng bruă hlue ngă tla ênoh răng mgang dliê ti dŭm anôk bruă răng mgang dliê, dŭm kdriêk; ktuê dlăng bruă răng mgang klei êđăp ênang ala ƀuôn; hlue ngă klei ktuê dlăng hlue si klei gĭt gai mơ̆ng knŭk kna kơ klei yua ngăn drăp knŭk kna hlăm klei dưi mơ̆ng knŭk kna ti đa đa anôk bruă leh anăn ktuê dlăng kơ klei bi mlih mơ̆ng hdră kčah dliê tơdah ngă hdră bruă êlan dơ̆ng êran pral Ƀuôn Ama Thuôt- Khánh Hoà.