VOV4.Êđê -  Hdră đru kơ klei prăk mlan amâo mâo djăp yua ôh hlăm klei hdĭp, jing klei ktrŏ êdi hŏng phung knuă druh ngă bruă răng mgang dliê bi mdei bruă, mâo lu bruă rŭ mkra klei bi êran pui kmlă hŏng ai angĭn ti Gialai mâo bi leh, ƀiădah ka dưi bi êran ôh, anăn yơh jing lu klei phung ƀuôn sang dôk mđing, ba bi trông ti anôk bi kƀĭn Êpul Gơ̆ng bruă ƀuôn sang čar Gialai gưl 12 hrue mbrue (8/7). Hlăm klei êmuh phung khua bi ala Êpul Gơ̆ng bruă ƀuôn sang, snăn mâo leh lu klei phung ƀuôn sang êmuh.

Hlăm anăn êdah êdi jing kơ bruă răng mgang dliê dôk tuôm hŏng lu klei dleh dlan, ngă luič liê ngăn prăk mơ̆ng bruă rŭ mkra phŭn pui bi êran hŏng ai angĭn, kơ klei triêk lăn pla mjing čiăng bi čhĭ mnia dôk mâo lu. Wĭt lač jih jang klei dleh dlan hlăm bruă răng mgang dliê, Lưu Trung Nghiã, Khua knơ̆ng bruă lŏ hma Gialai lač: Wưng leh êgao, êpul bruă truăn kơ klei răng mgang dliê čar Gialai mâo nanao mnuih akâo mdei bruă. Kyua prăk mlan ƀiă, hdră êlan đru amâo mâo năng ôh, bruă knuă mă lĕ ktrŏ./.

Y-Khem pô mblang