VOV4.Êđê- Aguah hruê 7/3, ƀuôn prŏng Đà Nẵng, mkŏ mjing Klei bi kƀĭn ksiêm wĭt bruă knuă Êpul gơ̆ng bruă ƀuôn sang dŭm čar, ƀuôn prŏng krĭng kwar Krah, Lăn Dap Kngư thŭn 2021 leh anăn pŏk ngă hdră kčah bruă kuă thŭn 2022. Thŭn 2021, dŭm alŭ wăl gĭr hgao klei dleh dlan, mkŏ mjing tŭ jing klei ruah khua phung bi ala bruă kƀĭn ala gưl 15 leh anăn phung bi ala Êpul gơ̆ng bruă ƀuôn sang dŭm gưl wưng thŭn 2021-2026. K’iăng Khua Bruă kƀĭn ala Trần Thanh Mẫn lač, Êpul gơ̆ng bruă ƀuôn sang dŭm čar, ƀuôn prŏng ngă jăk bruă ktuê dlăng, mlih mrâo, mđĭ hnơ̆ng jăk êmuh leh anăn wĭt lač klei êmuh, mkŏ mjing lu bruă ktuê dlăng thơ̆ng kơ bruă. Khădah, Trần Thanh Mẫn rŭng răng kơ bruă blei mnơ̆ng knŭk kna, lu alŭ wăl ngă jăk, ƀiădah mâo alŭ wăl amâo ngă ôh amâodah ngă amâo djŏ hdră kčah ngă truh kơ klei ngă soh. Êpul gơ̆ng bruă ƀuôn sang jing anôk bruă ktuê dlăng ƀiădah ka thâo ƀuh ôh dŭm klei ngă soh anei. Kơ hdră tă, bruă klam leh anăn dŭm hdră msir bruă knuă thŭn 2022, K’iăng Khua bruă kƀĭn ala Trần Thanh Mẫn mtă kơ Êpul gơ̆ng bruă ƀuôn sang dŭm čar, ƀuôn prŏng lŏ dơ̆ng ktuê dlăng, mkŏ mjing bi leh, leh anăn mkŏ mjing hlue ngă Hdră bruă lŏ dơ̆ng mlih mrâo, mđĭ hnơ̆ng klei bi kƀĭn, hnơ̆ng jăk ngă bruă, bi tuôm hŏng phung bi ala kơ mnuih ƀuôn sang, bruă ktuê dlăng êmuh, wĭt lač klei êmuh.

Pô mblang: H’Zawut Ƀuôn Yă