Ti anôk mă bruă mơ̆ng knơ̆ng bruă sang čư̆ êa čar Daknông hrue mbrue 08/4, Êpul grŭp mnơ̆ng hlăm gŭ lăn (TKV) mâo leh klei hâo mdah kơ hdră ksiêm duah, kuai mă lehanăn mkra mjing mnơ̆ng hlăm gŭ lăn wưng thŭn 2021-2030 lehanăn ngă bruă mă  Bauxite mơ̆ng êpul grŭp TKV hlăm čar. Mơ̆ng anăn, TKV kah leh giăm 1.000 êklai prăk pioh ksiêm duah anôk mâo bauxit ti čar Dak Nông, čiăng dưi mâo djăp mnơ̆ng pioh kơ bruă mkra mjing Bô xít – Alumin – ksueh ti čar anei.

TKV đăo knang kơ bruă anei srăng dưi ngă hlăm wưng giăm hĭn. Ti anôk ngă bruă, phung khua kiă kriê êpul grŭp mnơ̆ng hlăm gŭ lăn (TKV) bi êdah leh dŭm klei dleh dlan, klei gun kpăk hlăm bruă knuă wưng leh êgao, lehanăn mâo dŭm hdră êlan mă bruă jăk hĭn hlăm wưng kơ anăp lehanăn mâo klei bi êdah, klei akâo kơ dŭm mta bruă djŏ tuôm hŏng klei ksiêm duah, kuai mă lehanăn mkra mjing Bô xít, Alunmin, ksueh.