VOV4.Êđê- Aguah mbrue (6/4), Êpul hgŭm gru bi kal hrah čar Daklak mkŏ mjing leh klei tŭ mă ênoh prăk lehanăn mnơ̆ng hŏng ênoh jih jang êbeh 1 êklai 200 êklăk prăk mơ̆ng dŭm êpul êya bruă đru dŏng mkăp kơ dŭm bruă kơ klei hdĭp mda ala ƀuôn hlăm čar. Ti anôk tŭ mă anăn, phung đru dŏng jao leh ênoh prăk đru rŭ mdơ̆ng 4 boh sang bi đru hŏng ênoh jih jang 320 êklăk prăk, mđup brei 1 êbâo giêt kar êa lehanăn 500 boh kpur amâo đei mâo săp pui ôh, hŏng ênoh jih jang truh 950 êklăk prăk.

Aduôn Trần Thị Phương Thu, k'iăng khua kiă kriê Êpul hgŭm gru bi kal hrah čar Daklak brei thâo, Êpul hgŭm srăng ksiêm, hrŏng ruah hlei gŏ sang dleh dlan sĭt, snăn srăng mâo klei đru rŭ mdơ̆ng brei sang dôk. Bi giêt kar êa, lehanăn kpur pui, êpul hgŭm mbha leh kơ dŭm êpul êya bruă pioh đru kơ dŭm gŏ êsei ƀun amâo mâo klei găl dưi yua gas, ti dŭm kdriêk krĭng tlung msĕ si Lăk, Êa Sup kreh tuôm nanao hŏng klei êa lip. Anei jing bruă mơ̆ng phung duh mkra ngă kñăm hrăm mbĭt bi đru kơ phung hdĭp hlăm klei dleh dlan, đru mkŏ mkra krĭng ƀuôn sang mrâo, ƀuôn prŏng dhar kreh ti alŭ wăl./.

Pô mblang: Y-Khem Niê